ITEMVIDEOS: నెట్టింట్లో వైరల్: ప్రజాగాయకుడు గద్దర్ పాడిన ‘బానిసలారా లెండిరా’ పాట.!

Posted: 08/10/2022 12:48 PM IST

ప్రజా యుద్ధ నౌక గద్దర్ పాడిన 'బానిసలారా లెండిరా' అనే పాట సోషల్ మీడియాలో తెగ వైరల్ అవుతోంది. నెటిజెన్ల నుంచి ఈ పాటకు విపరీతమైన స్పందన వస్తోంది. ఈ పాటను గద్దర్ స్వయంగా రాయడమే కాక... హృదయాలను తాకేలా పాడారు. మహిళలను, యువతరాన్ని, రాజకీయ నేతలను టార్గెట్ చేసుకుని ఆయన సంధించిన ఈ పాట నిజంగానే సమాజంలోని ఆయా వర్గాలను తట్టి లేపినట్టుగా ఉంది. అడక్కుతింటే కడపు నిండదు.. గుద్ది గుంజుకుందామురా.. అంటూ నేటి యువతరం శైలిలో కొత్తగా హక్కుల కోసం పోరాడేందుకు కదలండీ అంటూ నినదించారాయన.

గద్దర్ రాసి.. స్వరపర్చిన ఈ విప్లవ గీతాన్ని ప్రముఖ సినీ సంగీత దర్శకుడు ఎంఎం కీరవాణి సంగీతాన్ని అందించారు. ఈ పాటకు సుచిత్రా చంద్రబోస్ కొరియోగ్రఫీని అందించారు. బొమ్మాకు మురళి నిర్మిస్తున్న సినిమా కోసం గద్దర్ ఈ పాటను పాడారు. ఈ సినిమాలో సీనియర్ నటి సితార, రాజకీయ నేత అద్దంకి దయాకర్ కీలక పాత్రలను పోషించారు. ఈ చిత్రానికి ఇంకా పేరు పెట్టలేదు. బొమ్మాకు క్రియేషన్స్ పతాకంపై బొమ్మాకు మురళి ఈ సినిమాను నిర్మించారు. ఆ పాట సాగిందిలా.. బానిసలారా లెండిరా.. ఓ నా బానిసలారా.. పుట్టుకతో ఎవరు బానిసలు కారు. అధికారం, దౌర్జన్యం. అణచివేత, అర్థిక దోపిడీ.. మనిషిని, మానవత్వాన్ని బానిస సంకెళ్లతో బంధించారు.. లెండి.. రండి.. బానిసలారా.. బానిసలారా లెండిరా.. ఈ బాంచన్ బతుకులు వద్దురా.. అడుక్కతింటే మన ఆకలి తీరది.. గుద్ది గుంజుకుందామురో..