కరోనా అలెర్ట్: తిరుమల శ్రీవారి సిబ్బందికి ఉచితంగా లడ్డూ ప్రసాదం

Posted: 03/21/2020 02:26 PM IST

Coronavirus tirumala temple staff and employees to get free laddu prasadam

కరోనా వైరస్ వ్యాప్తితో తిరుమలలో టీటీడీ చరిత్రలోనే సంచలన నిర్ణయం తీసుకుని వెంకన్న దర్శనానికి భక్తుల రానీయకుండా చర్యలు చేపట్టింది. తిరుమల శ్రీవారి దర్శనాన్ని తాత్కాలికంగా నిలిపివేసిన విషయం తెలిసిందే. తిరుమలకు చేరుకునే ఘాట్ రోడ్డుతో పాటు రెండు మెట్ల మార్గాలను కూడా అధికారులు మూసివేయించడంతో కొంతపై కరోనా వ్యాధి ప్రబలకుండా తక్షణ చర్యలు చేపట్టారు. తిరుమలలో కరోనా అనుమానిత వ్యక్తిని గుర్తించిన అధికారులు.. తీవ్ర అస్వస్థతకు గురైన సదరు భక్తడిని తిరుపతిలోని రుయా అసుపత్రికి తరలించి చికిత్సను అందిస్తున్న విషయం తెలిసిందే.

ఈ నేపథ్యంలో తిరుమల తిరుపతి దేవస్థానం సిబ్బందికి శుభవార్తను అందించింది తిరుమల పాలకమండలి. ఉగాది కానుకగా ఈ నెల 25వ తేదీన శ్రీవారి లడ్డూలు ప్రతి కుటుంబానికి ఉచితంగా అందించాలని టీటీడీ నిర్ణయించింది. తిరుమల శ్రీవారి లడ్డూకు ఉన్న డిమాండ్‌ అంతా ఇంతాకాదు. స్వామి దర్శనం చేసుకున్న భక్తులకు ఒక లడ్డూ ఉచితంగా ఇస్తారు. దీనికి అదనంగా ఎన్నయినా కొనుక్కునే అవకాశం ఉంది. భక్తుల డిమాండ్ ను దృష్టిలో పెట్టుకుని దేవస్థానం నిత్యం లక్షల్లో లడ్డూలు తయారు చేసి నిల్వ ఉంచుతుంది.

కాగా, ప్రస్తుతం దేశవ్యాప్తంగా కరోనా ప్రభావం తీవ్రంగా ఉండడంతో శ్రీవారి దర్శనానికి భక్తుల రాకను నిలిపివేసిన విషయం తెలిసిందే. అయితే అంతకు ముందే దాదాపు రెండు లక్షల లడ్డూలను దేవస్థానం సిద్ధం చేసి ఉంచింది. తిరిగి ఆలయంలోకి భక్తుల ప్రవేశం ఎప్పుడన్నది కచ్చితంగా తెలియదు. ఈ పరిస్థితుల్లో ఉన్న నిల్వలను సిబ్బందికైనా పంచిపెడితే వారు సంతోషిస్తారని దేవస్థానం బోర్డు ఈ నిర్ణయం తీసుకుంది. దీంతో ఉగాది కానుకగా ఈ లడ్డూలను తిరుమల తిరుపతి దేవస్థానం ఉద్యోగులు, సిబ్బంది అందుకోనున్నారు.