బీజేపి నూతన జాతీయ అధ్యక్షుడిగా జేపీ నడ్డా ఏకగ్రీవ ఎన్నిక

Posted: 01/20/2020 04:04 PM IST

బీజేపి పార్టీ నూతన జాతీయ అధ్యక్షుడిగా జేపీ నడ్డా ఏకగ్రీవంగా ఎన్నికయ్యారు. బీజేపి పార్టీకి 11వ జాతీయ అధ్యక్షుడిగా ఆయన ఇవాళ ఏకగ్రీవంగా ఎన్నికయ్యారు. ఢిల్లీలోని బీజేపి కార్యాలయానికి చేరుకున్న పార్టీ ముఖ్య నాయకులు నడ్డాను అధ్యక్షుడిగా ప్రతిపాదించారు. దీంతో ఆయన ఎలాంటి పోటీ లేకుండా బీజేపి జాతీయ అధ్యక్షుడిగా ఎన్నికైనట్లు సీనియర్‌ నాయకులు రాధామోహన్ సింగ్‌ అధికారికంగా ప్రకటించారు. గతంలో బీజేపి జాతీయ కార్యనిర్వాహక అధ్యక్షుడిగా సేవలందించిన నడ్డా కేంద్ర హోంమంత్రి అమిత్ షా నుంచి అధ్యక్ష బాధ్యతలు స్వీకరించారు.

అనంతరం పార్టీ నేతలు అమిత్ షా సహా తదితర ముఖ్య నాయకులు ఆయనకు శుభాకాంక్షలు తెలియజేశారు. అటు ప్రధాని నరేంద్ర మోదీని కూడా జేపి నడ్డా కలువనున్నారు. ఈ క్రమంతో నడ్డాను ప్రధాని సత్కరించనున్నారని కూడా సమాచారం అందింది. ఆ తరువాత అనంతరం పార్టీ ముఖ్యనేతలతో ప్రధాని, నడ్డాలు సమావేశం కానున్నారు. హిమాచల్ ప్రదేశ్ కు చెందిన ఈ నేత గతంలో మూడు సార్లు ఎమ్మెల్యేగా ఎన్నికై.. ఆ తర్వాత కేంద్ర ఆరోగ్య మంత్రిగానూ పలు పదవుల్లో పనిచేశారు. 2019 లోక్‌సభ ఎన్నికల సమయంలోనూ ఆయన బీజేపి విజయంలో కీలక పాత్ర పోషించారు.