లండన్ లో తెలంగాణ బీజేపి నేత కుమారుడు మిస్పింగ్..

Posted: 08/24/2019 11:29 AM IST

ఉన్నత విద్యాను అభ్యసించడానికి లండన్ కు వెళ్లిన తెలుగు విద్యార్థి సన్నే శ్రీ హర్ష అదృశ్యమయ్యాడన్న వార్త తెలుగు రాష్ట్రాల్లో కలకలం రేపుతోంది. తెలంగాణ రాష్ట్రానికి చెందిన ఈ విద్యార్థి అదృశ్యం కావడంపై బీజేపి నేతలు కూడ కలవరపడుతున్నారు. ఖమ్మం జిల్లా బీజేపీ అధ్యక్షుడిగా వ్యవహరిస్తున్న ఉదయ్ ప్రతాప్ కుమారుడైన శ్రీహర్ష లండన్ లో పీజీ చదువుతున్నారు. రెండ్రోజులుగా శ్రీహర్ష నుంచి ఎలాంటి సమాచారం లేకపోవడంతో ఆందోళన పడిన కుటుంబసభ్యులు అతడి స్నేహితులను సంప్రదించారు.

దీంతో వారు స్థానిక పోలీసులను సంప్రదించగా యువకుడి కోసం గాలింపు చేపట్టారు. లండన్ లోని బీచ్‌హెడ్‌డి అనే బీచ్‌ సమీపంలో శ్రీహర్షకు సంబంధించి ల్యాప్ టాప్ ను గుర్తించారు. దీంతో బీచ్ పరిసర ప్రాంతాల్లో హెలికాప్టర్ల సాయంతో పోలీసులు గాలింపు చేపట్టారు. మిస్సింగ్‌ కేసు కూడా నమోదు చేశారు. లండన్ లోని పోలీసులు ఖమ్మంలోని హర్ష కుటుంబ సభ్యులకు సమాచారం ఇచ్చారు. దీంతో అందోళనకు గురైన హర్ష తల్లిదండ్రులు కేంద్ర హోంశాఖ మంత్రి కిషన్‌రెడ్డి దృష్టికి విషయాన్ని తీసుకువెళ్లారు.

కాగా, శ్రీహర్ష ‘‘హ్యాండోవర్ మై బిలాంగింగ్స్ టు పేరెంట్స్’’ అని ఒక చిన్న సందేశం రాసినట్లు తెలుస్తోంది. దీంతో రెండు హెలికాప్టర్ల సహాయంతో బీచ్ ప్రాంతంలో పోలీసులు గాలిస్తున్నారు. మిస్సింగ్ సమాచారం తెలియగానే బంధువులు, స్థానిక రాజకీయ నేతలు వారి కుటుంబాన్ని పరామర్శించారు. విషయం తెలుసుకున్న ఎంపీ నామా నాగేశ్వరరావు... ఫోన్లో హర్ష తండ్రి ప్రతాప్‌ తోపాటు వారి బంధువులతో మాట్లాడారు. హర్ష ఆచూకీ కనుగొనడానికి తనవంతు సహకారం అందిస్తానని తెలిపారు. కేంద్రం ఈ విషయంపై ఆరా తీస్తోంది.