దిల్ రాజు ఇళ్లు, కార్యాలయాలపై ఐటీ దాడులు

Posted: 05/08/2019 01:37 PM IST

It raids at dil raju house day before maharshi release

ప్రముఖ తెలుగు సినీ నిర్మాత దిల్ రాజు కు ఆదాయపన్నుశాఖ అధికారులు షాక్ ఇచ్చారు. ఆయన నిర్మిస్తున్న మహర్షి చిత్రం విడుదలకు కొన్ని గంటల వ్యవధి ముందు దాడులు చేసిన ఐటీ అధికారులు సోదాలు నిర్వహిస్తున్నారు. హైదరాబాద్ లోని ఆయన ఇంటితో పాటు కార్యాలయంలో ఐటీ అధికారులు దాడులు నిర్వహించారు. కొద్దిసేపటి క్రితమే బృందాలుగా విడిపోయిన అధికారులు ఇంటితో పాటు ఆఫీసులను రికార్డులను పరిశీలిస్తున్నారు.

సాగర్ సొసైటీలోని దిల్ రాజు ఆఫీస్ లో ఈ సోదాలు జరుగుతున్నాయి. 5 బృందాలుగా ఐటీ అధికారుల రంగంలోకి దిగి ఇళ్లు, కార్యాలయాలపైన సోదాలు నిర్వహిస్తున్నాయి. అనూహ్యంగా దిల్ రాజు ఆఫీస్ లో ఐటీ సోదాలు జరగడం ఇండస్ట్రీ వర్గాల్లో చర్చనీయాంశంగా మారింది. అసలేం జరుగుతుందో తెలియక టెన్షన్ పడుతున్నారు. మహేశ్ బాబు హీరోగా నటించిన మహర్షికి సినిమాకు దిల్ రాజు సహ-నిర్మాతగా వ్యవహరించారు.

దీంతో ఈ సినిమా బడ్జెట్‌, బిజినెస్‌, కలెక్షన్లపై అధికారులు ఆరా తీస్తున్నారు. దిల్ రాజు నిర్మాతగా వ్యవహరించిన ఎఫ్2 సినిమా కూడా మంచి విజయాన్ని అందుకుంది. దీంతో గతంలో చెల్లించిన పన్ను, కలెక్షన్లను కూడా అధికారులు పరిశీలిస్తున్నట్లు సమాచారం. మహేశ్ బాబు, పూజాహెగ్డే జంటగా నటించిన మహర్షి సినిమాకు శ్రీ వెంకటేశ్వర క్రియేషన్స్, వైజయంతీ మూవీస్, పీవీపీ సినిమా బ్యానర్లపై దిల్ రాజు, అశ్వినీదత్, ప్రసాద్ వి. పొట్లూరి నిర్మించారు.