జనసేనలో చేరిన బీజేపీ ఎమ్మెల్యే అకుల సత్యనారాయణ..!

Posted: 01/21/2019 04:32 PM IST

తూర్పుగోదావరి జిల్లా రాజమహేంద్రవరం అర్బన్ ఎమ్మెల్యే, బీజేపీ సీనియర్ నేతల ఆకుల సత్యనారాయణ జనసేన పార్టీలో చేరారు. సోమవారం విజయవాడలోని పార్టీ కార్యాలయంలో పవన్ కళ్యాణ్ సమక్షంలో జనసేన కండువా కప్పుకున్నారు. సత్యనారాయణతో పాటూ ఆయన సతీమణి పద్మావతి, ముఖ్య అనుచరులు జనసేన తీర్థం పుచ్చుకున్నారు. జనసేనలో చేరడం ఆనందంగా ఉందన్నారు సత్యనారాయణ.. తూర్పుగోదావరి జిల్లాలో పార్టీ బలోపేతానికి తనవంతు కృషి చేస్తానన్నారు.

ఆకుల సత్యనారాయణ పార్టీలో చేరడం శుభపరిణామన్నారు పవన్ కళ్యాణ్. 2014లో పొత్తులో భాగంగా ఆకులకు మద్దతిచ్చామని.. ఆయన చేరికతో జనసేన మరింత బలోపేతం అవుతుందన్నారు. తూర్పుగోదావరి జిల్లాలో ఆకుల కుటుంబానికి ప్రత్యేక గౌరవం ఉందని.. జనసేన పార్టీ ఆయనకు అండగా ఉండి ప్రోత్సాహం ఇస్తుందన్నారు జనసేనాని. అంతకుముందు సత్యనారాయణ తన అనుచరులు, మద్దతు దారులతో కలిసి రాజమహేంద్రవరం నుంచి ర్యాలీగా విజయవాడకు బయల్దేరారు.

సాయంత్రానికి విజయవాడ చేరుకొని పవన్ సమక్షంలో జనసేనలో చేరారు. గత వారమే ఆకుల సత్యనారాయణ తన ఎమ్మెల్యే పదవికి, బీజేపీ సభ్యత్వానికి రాజీనామా చేశారు. రాజీనామా లేఖల్ని స్పీకర్ కోడెల శివప్రసాదరావు, బీజేపీ అధ్యక్షుడు కన్నా లక్ష్మీనారాయణకు పంపారు. తర్వాత జనసేనలో చేరుతున్నట్లు ప్రకటించారు. పవన్ ఎక్కడి నుంచి పోటీ చేయమంటే తాను అక్కడి నుంచి పోటీ చేస్తానని, రాజకీయ వ్యవస్థను పవన్ ప్రక్షాళన చేస్తారని తనకు నమ్మకం ఉందన్నారు ఆకుల.

2014 ఎన్నికల్లో టీడీపీ, బీజేపీ పొత్తులో భాగంగా బీజేపీ అభ్యర్థిగా రాజమండ్రి అర్బన్ స్థానం నుంచి ఆకుల సత్యనారాయణ పోటీ చేసి విజయం సాధించారు. ఓ పక్క ఆయన బీజేపీ ఎమ్మెల్యేగా ఉన్నా.. ఆయన భార్య పద్మావతి జనసేన పార్టీ కార్యక్రమాలలో చురుకుగా పాల్గొనేవారు. ఉద్దానం కిడ్నీ బాధితులను ఆదుకోవాలంటూ శ్రీకాకుళంలో జనసేనాని చేసిన దీక్షకు మద్దతుగా రాజమండ్రి సబ్ కలెక్టర్‌ ఆఫీసు వద్ద పద్మావతి దీక్ష చేశారు.

జనసేన పార్టీలో చేరిన రాజ‌మండ్రి ఎమ్మెల్యే శ్రీ ఆకుల‌ సత్యనారాయణ గారు.

Full Album : https://t.co/SV6QaP4W02 pic.twitter.com/Zr7sOxtITu

— JanaSena Party (@JanaSenaParty) January 21, 2019