నా తమ్ముడే జయలలితను చంపేశాడు

Posted: 06/12/2017 08:28 AM IST

తమిళనాడులో మరో డ్రామాకు తెరలేచింది. అన్నాడీఎంకే పార్టీ ముక్కలుగా చీలటమే కాదు.. ఒకరిపై ఒకరు తీవ్ర స్థాయిలో ఆరోపణలు చేసుకునిపోయేదాకా వెళ్లింది. అమ్మ జిరాక్స్ గా అభిమానులు పిలుచుకుంటున్న దీపా జయకుమార్ సంచలన ఆరోపణలకు దిగింది. తన సొంత సోదరుడే మేనత్త జయలలితను హత్య చేశాడని వ్యాఖ్యలు చేసి పెను దుమారం రేపింది.

శశికళతో అధికారం కోసం చేతులు కలిపిన దీపక్ హత్య చేశాడని చెబుతోంది. తన పిర్గా ఎంజీఆర్ అమ్మ దీపా పెరవై అనుచరులతో కలిసి పోయెస్ గార్డెన్ కు వెళ్లిన దీపా జయకుమార్ ను వేదనిలయంలోకి వెళ్లకుండా దీపక్ అడ్డుకున్నాడు. ఈ సందర్భంగా రెండు వర్గాల మధ్య తోపులాట చోటుచేసుకుంది. దీంతో రంగప్రవేశం చేసిన పోలీసులు ఇరు వర్గాలను అడ్డుకున్నారు.

దీంతో ఆందోళన చేసి, ఇంటికి చేరిన దీప మీడియాతో మాట్లాడుతూ, శశికళతో కుమ్మక్కై తన సోదరుడే అత్త (జయలలిత) ను అంతమొందించాడని, ఇప్పుడు దినకరన్ తో చేతులు కలిపి తననూ అంతమొందించాలనుకుంటున్నాడని ఆరోపించింది. పొయెస్ గార్డెన్ కు సంబంధించిన పత్రాలు తన దగ్గర పెట్టుకున్నాడని, ఒకసారి రావాలని ఫోన్ చేసిన దీపక్ తాను అక్కడికి చేరుకున్న అనంతరం తనను అడ్డుకునేందుకు ఎందుకు ప్రయత్నించాల్సి వచ్చిందని ప్రశ్నించింది.

దీనిపై దీపక్ సమాధానమిస్తూ, తన సోదరి చీప్ పబ్లిసిటీకి పాకులాడుతోందని ఎద్దేవా చేశాడు. మొత్తానికి ఈ ఇద్దరు వేద నిలయాన్ని దక్కించుకునేందుకు గట్టిగానే ప్రయత్నిస్తున్నారు. కాగా, ఇంకోపక్క దీనిని అమ్మ స్మారక భవనంగా మార్చాలంటూ పన్నీర్ సెల్వం డిమాండ్ చేస్తున్న విషయం తెలిసిందే.

విలీనం చర్చలు క్లోజ్...

అన్నాడీఎంకే రెబల్ లీడర్, మాజీ ముఖ్యమంత్రి పన్నీర్ సెల్వం కీలక నిర్ణయం తీసుకున్నాడు. పళని వర్గంతో విలీన చర్చల కోసం ఏర్పాటు చేసిన ప్యానల్‌ను రద్దు చేస్తున్నట్టు పన్నీర్ సెల్వం ఆదివారం ప్రకటించేశాడు.కాగా, కొన్ని డిమాండ్లతో పార్టీని అన్నాడీఎంకే (శశికళ)లో విలీనం చేసేందుకు ఓపీఎస్ ముందుకొచ్చారు. శశికళ, ఆమె కుటుంబ సభ్యులను పార్టీ నుంచి పూర్తిగా బహిష్కరించడంతో పాటు మరికొన్ని డిమాండ్లను పళని ముందుంచారు. అయితే ఇరు వర్గాల మధ్య చర్చలు అసంపూర్తిగా మిగిలాయి.

శశికళ వర్గాన్ని పార్టీ నుంచి బహిష్కరించేందుకు పళని వర్గం అంగీకరించలేదు. అయితే పార్టీ కార్యకర్తలతో నిర్వహించిన సమావేశంలో సీనియర్ లీడర్ల ఒత్తిడి మేరకు ఆయనీ ప్రకటన చేశాడు. ఓపీఎస్ ప్రకటనతో కార్యకర్తల్లో ఆనందం వ్యక్తమైంది.