గులాబీ బాస్ గా 8వసారి కేసీఆర్

Posted: 04/21/2017 10:52 AM IST

తెలంగాణ రాష్ట్ర సమితి పార్టీ 16వ వ్యవస్థాపక దినోత్సవం సందర్భంగా జరిగిన అధ్యక్ష ఎన్నికలో మరోసారి కే చంద్రశేఖర్ రావు ఘన విజయం సాధించాడు. బరిలో ఎవరూ నిలవకపోవటంతో వరుసగా 8వసారి గులాబీ బాస్ గా ఏకగ్రీవంగా ఎన్నికయ్యాడు. దీనిపై రిటర్నింగ్ అధికారి, హోం మంత్రి నాయిని నరసింహారెడ్డి అధికారిక ప్రకటన చేశాడు. కొద్దిసేపటి క్రితం మీడియాతో మాట్లాడిన నాయిని, అధ్యక్ష పదవికి ఎన్నికలు ప్రకటించిన తర్వాత కేబినెట్ మంత్రులు 2 సెట్ల నామినేషన్ కేసీఆర్ తరపున దాఖలు చేశారని తెలిపాడు.

పార్లమెంట్ సభ్యులు, మండలి సభ్యులు ఒక్కో సెట్ చొప్పున, శాసన సభ్యులు నాలుగు సెట్లు, జడ్పీ చైర్ పర్సన్, కార్పొరేషన్ చైర్మన్లు, వ్యవసాయ మార్కెటింగ్ కమిటీ చైర్మన్లు, జిల్లా పార్టీ అధ్యక్షుడు ఒక్కో సెట్ చొప్పున కేసీఆర్ పేరిట నామినేషన్లు వేశారని అన్నారు. దీంతో ఆయన ఎన్నిక ఏకగ్రీవమైందని వెల్లడించారు. నిర్ణయం వెలువడగానే టీఆర్ ఎస్ భవన్ వద్ద పటాసులు పేల్చుకుంటూ కార్యకర్తలు సంబరాలు చేసుకున్నారు.

ఇక అధ్యక్షుడిగా ఎన్నికైన కేసీఆర్ సాంప్రదాయబద్ధంగా ప్లీనరీకి హజరు అవుతాడు. కోంపల్లిలో జరగబోతున్న ప్లీనరీ కోసం పార్టీ నేతలు దాదాపు రెండు నెలుగా కష్టపడి ఏర్పాట్లు చేశారని మంత్రి తలసాని తెలిపాడు. బంగారు తెలంగాణ సాధనలో భాగంగా తీసుకోవాల్సిన చర్యలపై ఇక్కడ నిర్ణయాలు తీసుకోబోతున్నట్లు పేర్కొన్నాడు. ఇక ప్లీనరికి వచ్చిన వారందరికీ తెలంగాణ వంటకాలతో విందు సిద్ధం చేశారు. పార్టీ అధ్యక్షుడి ప్రసంగం అనంతరం పలు తీర్మానాలపై ఇక్కడ చర్చలు సాగనున్నాయి.