ట్రంప్ జస్ట్ మిస్సయ్యాడు

Posted: 06/21/2016 10:31 AM IST

British man several times attempt to kill trump

అమెరికా అధ్యక్ష ఎన్నికల్లో పోటీ పడుతున్న డొనాల్డ్ ట్రంప్ పై ఓ బ్రిటన్ యువకుడు హత్యాయత్నం చేశాడు. 19 ఏళ్ల మైఖేల్ స్టాన్ ఫోర్డ్, పోలీసుల వద్ద ఉన్న తుపాకిని లాక్కొని ట్రంప్ పై కాల్పులు జరపబోయాడు. దీంతో పెను కలకలం రేగింది. లాస్ వెగాస్ సమీపంలోని ట్రెజర్ ఐలాండ్ కాసినో వద్ద ట్రంప్ ఓ ర్యాలీని నిర్వహిస్తున్న వేళ ఈ ఘటన జరిగింది. మైఖేల్ ప్రయత్నాన్ని పోలీసులు అడ్డుకుని అదుపులోకి తీసుకుని విచారించగా, అతను చెప్పిన వివరాలు విని పోలీసులే షాక్ అయ్యారు. తాను ఎన్నడూ తుపాకీని వాడలేదని, తనను భద్రతాదళాలు చంపుతాయని తెలుసునని చెప్పాడు. ఒకవేళ, ఇక్కడ విఫలమైతే, ఆపై ఫోనిక్స్ లో ట్రంప్ ర్యాలీలో పాల్గొని చంపేందుకు ప్లాన్ వేశానని తెలిపాడు.

ఇక ట్రంప్ పై హత్యాయత్నం చేసిన మైఖేల్ స్టాన్ ఫోర్డ్, గత ఏడాదిన్నరగా అమెరికాలో ఉంటున్నాడని, ఎన్నోసార్లు ఆయన్ను చంపాలని ప్రయత్నించాడని ఫెడరల్ అధికారులు వెల్లడించారు. సంవత్సరం నుంచి ట్రంప్ ప్రచారం చేస్తున్న పలు ర్యాలీలకు వెళ్లి, అక్కడ విఫలమయ్యాడని తెలిపారు. బక్కపలచగా, చూడటానికి అమాయకంగా కనిపించే మైఖేల్, హోబోకెన్, న్యూజర్సీ, కాలిఫోర్నియా తదితర ప్రాంతాల్లో తిరిగాడని అధికారులు పేర్కొన్నారు. సొంతంగా తుపాకీని తెస్తే, పోలీసుల ఫ్రిస్కింగ్ లో భాగంగా దొరికి పోతానన్న భయంతోనే పోలీసు నుంచి లాక్కోవాలని ముందే ప్రణాళిక రచించుకున్నాడని వివరించారు. జాకబ్ అనే భద్రతాధికారి వద్ద అన్ లాక్ చేసున్న గన్ చూసి దాన్ని తీసుకుంటే సులువుగా కాల్పులు జరపవచ్చని భావించాడని, ఈ క్రమంలో తన ప్లాన్ విఫలమై దొరికిపోయాడని తెలియజేశారు. బ్రిటన్ ఎంబసీ సాయంతో మైఖేల్ ను పోలీసులు మరింత లోతుగా విచారిస్తున్నారు.

భాస్కర్