హాఫ్ టికెట్ లేదు.. ఇక ఫుల్లే

Posted: 04/02/2016 08:48 AM IST

రైల్వే స్టేషన్ లో టికెట్ కౌంటర్ దగ్గర భర్త నాలుగు టికెట్లు అనగానే.. భార్య కాదు కాదు మూడు, ఒక హాఫ్ అని అంటుంది. ఎందుకంటే పిల్లలకు బస్సుల్లో, రైళ్లల్లో టికెట్ ఎంత తీసుకుంటారు…? ఐదేళ్ల లోపైతే ఫ్రీగా.. ఆపైన 5 – 12 అయితే హాఫ్ టిక్కెట్ అంతే కదా.. కానీ ఇప్పుడు రైల్వే శాఖ రూట్ మార్చింది. పిల్లలకు హాఫ్ టిక్కెట్ కాస్తా ఫుల్ టిక్కెట్ చేసేసింది. ఈ నెల 21 నుంచి రైల్లో ప్రయాణించే పిల్లలకూ ఫుల్ టికెట్ వసూలుచేస్తారని తెలిపింది రైల్వే శాఖ. 5 – 12 సంవత్సరాల పిల్లలకు రిజర్వుడ్ క్లాస్‌లో విడిగా బెర్త్/సీటు కావాలనుకుంటే… వారి నుంచి పూర్తి టికెట్ చార్జీని వసూలు చేయాలని రైల్వే శాఖ నిర్ణయించింది.

రిజర్వేషన్ దరఖాస్తు నింపే సమయంలోనే పిల్లలకు విడిగా బెర్త్/సీటు కావాలా.. లేదా అనే విషయం చెప్పాల్సి ఉంటుంది. ఒకవేళ పిల్లలకు విడిగా బెర్త్/సీటు వద్దనుకుంటే వారికి ఇప్పుడున్నట్లే సగం చార్జీల విధానమే కొనసాగుతుంది. అన్‌ రిజర్వుడ్ టికెట్ల విధానంలో ఎలాంటి మార్పులేదు.మొత్తానికి సీటు కావాలంటే ఫుల్ టికెట్టే హాఫ్ టికెట్ కుదరదని రైల్వే శాఖ నిర్ణయం మీద ఎవరు ఎలా స్పందిస్తారో చూడాలి.