కన్హయ కుమార్ ను చంపేస్తాం

Posted: 03/28/2016 04:47 PM IST

దేవ్యాప్తంగా సంచలనానికి తెర తీసిన జెఎన్ యు విద్యార్థి కన్హయ కుమార్ కు తాజాగా మరోసారి హెచ్చరికలు జారీ అయ్యాయి. అయితే గతంలో లాగా కన్హయ కుమార్ ను కొడితే అంత డబ్బులు ఇస్తాం లేదంటే కన్హయ కుమార్ నాలుక కోస్తే రెండు లక్షలు ఇస్తాం అంటూ గతంలో వచ్చిన ప్రకటన మాదిరిగా కాకుండా ఇది ఏకంగా చంపేస్తామంటూ హెచ్చరికలు రావడం గమనార్హం. మార్చి నెలాఖరులోగా ఢిల్లీ నుండి వెళ్లిపోవాలని, లేకపోతే దుర్గాష్టమిలోగా కాల్చిపారేస్తాం అంటూ విద్యార్థి నేత కన్హయ్య కుమార్, ఉమర్ ఖలీద్‌లకు హెచ్చరికలు జారీ అయ్యాయి.

భారత సైన్యంపై కన్హయ్య కుమార్ చేసిన వ్యాఖ్యల నేపథ్యంలోనే ఈ హెచ్చరికలు జారీ అయినట్లు సమాచారం. ఈ హెచ్చరికలను ఉత్తర ప్రదేశ్ నవనిర్మాణ్ సేన జాతీయ అధ్యక్షుడు అమిత్ జానీ తన ఫేస్‌బుక్ పేజీలో పోస్ట్ చేశారు. ఇది సరైందేనా, ఇందుకు మద్దతిస్తారా అంటూ చేసిన పోస్ట్‌కు ఒకే రోజులో 2 వేల లైక్స్ కూడా వచ్చాయి. దీనితో పాటు వీరిద్దరినీ కాల్చి చంపలేకపోతే తాను రాజకీయాల నుంచి తప్పుకుంటానని కూడా అమిత్ జానీ ఆగ్రహం వ్యక్తం చేశారు. వీరు దుర్గా దేవిని కూడా అవమానించారు కాబట్టి వచ్చే నెల 8న దుర్గాష్టమిలోగా వీరిని కాల్చి చంపాలని నిర్ణయించినట్లు ఆయన పోస్ట్ లో పెట్టారు.