పవన్ కల్యాన్ పై రాయి విసిరిన గుర్తుతెలియని అగంతకుడు

Posted: 08/23/2015 01:50 PM IST

నవ్యాంధ్ర రాజధాని ప్రాంత రైతులకు తాను అండగా వుంటానని, వారి భూములను బలవంతంగా ప్రభుత్వం లాక్కుంటే తాను అడ్డపడతానని ముందునుంచి చెబుతూవస్తున్న ప్రముఖ నటుడు, జనసేన అధినేత పవర్ స్టార్ పవన్ కల్యాణ్ ఇవాళ రాజధాని ప్రాంతం అమరావతి గ్రామాల్లో పర్యటిస్తున్నారు. ఇవాళ ఉదయం హాయ్ లాండ్ నుంచి రాజధాని గ్రామాల్లోకి వెళ్లిన ఆన ముందుగా గుంటూరు జిల్లా పెనమాక గ్రామంలో రైతులతో మాట్లాడేందుకు వెళ్లారు. పవన్ కళ్యాన్ వేదికపైకి రాగానే గుర్తు తెలియని ఆగంతకుడు పవర్ స్టార్ పైకి రాయి విసిరాడు.

అదృష్టవశాత్తు రాయి పవన్ కల్యాన్ కు తగల్లేదు. ఆయనకు ఎలాంటి హాని కలుగలేదు. తన సమీపానికి వచ్చిన ఆ రాయిని పవన్ కాసేపు అలాగే పట్టుకుని కూర్చుని రైతులు చెప్పేది వింటూ వచ్చారు. ఈ సంఘటనతో అక్కడ ఒక్కసారిగా కలకలం రేగింది. వెంటనే పోలీసులు, జనసేన కార్యకర్తలు జనాన్ని నియంత్రించి పరిస్థితిని అదుపులోకి తెచ్చారు. అయితే పవన్ కల్యాన్ మాత్రం రాయి గురించి పట్టించుకోకుండా రైతులుతో మాట్లాడుతూనే వున్నారు. ఆయన అలా హుందగా ప్రవర్తించి వుండకపోతే పెనమాక గ్రామంలో భీతావహ వాతావరణం అలుముకునేదని, ఇది పవన్ కల్యాన్ ను రెచ్చగొట్టేందుకే జరిగిన చర్య అని పలువరు రైతులు అంటున్నారు.

జి. మనోహర్