‘బాహుబలి’ని కట్టప్ప ఎందుకు చంపాడో తెలుసా?

Posted: 07/24/2015 06:07 PM IST

దర్శకధీరుడు రాజమౌళి ఎంతో ప్రతిష్టాత్మకంగా రూపొందించిన ‘బాహుబలి’ చిత్రం ప్రపంచవ్యాప్తంగా భారీ విజయం సాధించింది. అంతేకాదు.. అత్యధిక కలెక్షన్లు సాధించిన దక్షిణాది సినిమాగా సరికొత్త రికార్డు సృష్టించింది. ఇంతటి ఘనవిజయం సాధించిన ఈ చిత్రానికి సంబంధించి ఓ విషయం సోషల్ మీడియాలో తెగ చక్కర్లు కొట్టేస్తోంది. ‘బాహుబలి’ సినిమాలో శివుడి(ప్రభాస్)కి ఫ్లాష్ బ్యాక్ చెప్పిన అనంతరం ముగింపు సందర్భంగా తానే ‘బాహుబలి’ని చంపానని కట్టప్ప (సత్యరాజ్) చెబుతాడు. అతను ఎందుకు చంపాడోనన్న రహస్యం తెలుసుకోవాలంటే.. ఈ సినిమా రెండో పార్ట్ వరకు ఆగాల్సిందే. కానీ.. ఇంతలోనే ఈ విషయమే సామాజిక మాధ్యమాల్లో విస్తృతంగా ప్రచారం జరుగుతోంది. అసలు ‘బాహుబలి’ని కట్టప్ప ఎందుకు చంపాడు? అన్న ప్రశ్న సోషల్ మీడియాలో తెగ హల్చల్ చేస్తోంది.

ఆ ప్రశ్నపై నెటిజన్లు వ్యంగ్యాస్త్రాలు, జోకులు, రకరకాల కామెంట్లతో సందడి చేస్తున్నారు. వాటిల్లో జోరుగా ప్రచారమవుతున్నవి రెండు కామెంట్లు వున్నాయి. అవేమిటంటే.. ‘బాహుబలి-ది బిగినింగ్’లో కట్టప్ప ప్లేటులో భోజనం చేసిన బాహుబలి, అతనిని మామా అని సంబోధించి అభిమాన పాత్రుడవుతాడు. అలా ప్రతిసారి కట్టప్ప దగ్గర భోజనం చేయడం బాహుబలి అలవాటుగా మార్చుకుంటాడు. అయితే.. ఓసారి ఆకలిగా తింటున్న కట్టప్ప ప్లేటును బాహుబలి లాగేసుకుంటాడు. దీంతో తీవ్ర కోపాద్రిక్తుడైన కట్టప్ప.. బాహుబలిని అంతమొందించ్చాడంటూ కొందరు సెటైర్లు వేసుకుంటున్నారు. ఇక రెండో జోక్ విషయానికొస్తే.. ‘మిర్చి’ సినిమాలో తన భార్య మరణానికి ప్రభాస్ కారణమని తెలుసుకున్న సత్యరాజ్.. బాహుబలి చిత్రంలో కట్టప్పగా మారి, బాహుబలిని చంపేసి తన ప్రతీకారం తీర్చుకున్నాడంటూ సరదాగా వ్యాఖ్యలు చేస్తున్నారు.

కేవలం ఇవి మాత్రమే కాదండోయ్.. ఆ ప్రశ్నపై ఇంకా ఎన్నో జోకులు సోషల్ మీడియాలో చక్కర్లు కొడుతున్నాయి. దీంతో ‘బాహుబలి’ని కట్టప్ప ఎందుకు చంపాడోనన్న ప్రశ్న సోషల్ మీడియాలో ‘క్వశ్చన్ ఆఫ్ ది ఇయర్’గా ప్రాచుర్యం పొందింది. ఈ ప్రశ్నపై సామాజిక మాధ్యమాల్లో చక్కర్లు కొడుతున్న మరిన్ని జోకులు మీకోసం...