‘సల్మాన్.. నా పేరు వాడుకున్నందుకు డబ్బులివ్వండి?’

Posted: 07/24/2015 07:29 PM IST

Pak journalist chand nawad demands to pay him for using his name bajrangi bhaijan movie

బాలీవుడ్ కండలవీరుడు సల్మాన్ ఖాన్ తాజాగా నటించిన ‘భజరంగీ భైజాన్’ చిత్రం ఇటీవలే విడుదలై బ్రాహ్మాండమైన విజయం నమోదు చేసుకుంది. ఇప్పటికీ బాక్సాఫీస్ దగ్గర భారీ కలెక్షన్లు కొల్లగొడుతోంది. ఇక ఇందులో సల్మాన్ నటించిన పాత్ర అతని జీవితంలో అద్భుతమైందంటూ విమర్శకులు సైతం ప్రశంసిస్తున్నారు. అలాగే.. సల్మాన్ తోపాటు నవాజుద్దీన్ సిద్ధిఖీ పాకిస్థాన్ జర్నలిస్ట్ పాత్రను ఎంతో బాగా పోషించాడంటూ ప్రేక్షకులు కితాబిచ్చారు. ఈ పాత్ర జర్నలిస్ట్ గా హాస్యం పంచి, భజరంగీకి సహాయం చేసి మానవత్వాన్ని చాటుకుంది. ఒక్కమాటలో చెప్పాలంటే.. ఈ జర్నలిస్ట్ పాత్ర సినిమాకి వెన్నముకలా సహకరించింది. నిజానికి ఈ పాత్రకు స్ఫూర్తి పాకిస్థాన్ లోని జర్నలిస్టుగా విధులు నిర్వహిస్తున్న చాంద్ నవాబ్ కావడం విశేషం. పైగా.. అతని పేరునే ఈ పాత్రకు కూడా పెట్టారు. దీంతో అతని ఇమేజ్ ఒక్కసారిగా పెరిగిపోయింది. ఒక సాధారణ జర్నలిస్టుగా వుండే అతను ఇప్పుడు స్టార్ గా మారిపోయాడు.

ఇదిలావుండగా.. ఈ సినిమా ఘనవిజయం సాధించన సందర్భంగా ఆ జర్నలిస్ట్ చాంద్ నవాజ్ పాకిస్థాన్ లోని ఓ న్యూస్ ఛానెల్ తో మాట్లాడాడు. ‘భజరంగీ భైజాన్’ సినిమాలో తన పేరు వినియోగించుకుని.. తనకు గొప్ప పాప్యులారిటీ తెచ్చిన సల్మాన్ ధన్యవాదాలని పేర్కొన్నాడు. ఇటువంటి గౌరవం తనకు జీవితంలో దక్కుతుందని ఎప్పుడూ భావించలేదని తెలిపాడు. ఇంతవరకు బాగానే వుంది కానీ.. తన పేరు వినియోగించుకున్నందుకు మాత్రం తనకు పరిహారం ఇవ్వాలని అతగాడు డిమాండ్ చేస్తున్నాడు. ‘తన పేరు వాడుకున్నందుకు పరిహారం ఇచ్చే వీలు లేదా?’ అని ఏకంగా సల్మాన్ నే ప్రశ్నిస్తున్నాడు. తానొక పేద జర్నలిస్టునని, తన పేరు వినియోగించునందుకు గాను పరిహారం పొందెందుకు చట్టాలు, న్యాయస్థానాల చుట్టూ తిరగలేనని నవాబ్ చెబుతున్నాడు. కాబట్టి.. తనకు రావాల్సిన పరిహారాన్ని సల్మాన్ ఖాన్ ఎలాగైనా ఇప్పించాలని, అతగాడు కోరుకుంటున్నాడు. మరి.. సల్మాన్ ఖాన్ ఆ జర్నలిస్టు కోరుకున్నట్లు పరిహారం ఇస్తాడా..? లేదా..? వేచి చూడాల్సిందే!