ది ఇంటర్య్వూ.. చిత్రం కాదు స్మార్ట్ ఫోన్ వైరస్..

Posted: 02/21/2015 04:05 PM IST

ది ఇంటర్య్వూ.. ఇది హాలివుడ్ చిత్రం కాదు స్మార్ట్ ఫోన్ వైరస్.. దేశంలో ఆండ్రాయిడ్ ఆధారిత స్మార్ట్‌ఫోన్లపై దాడి చేసేందుకు సరికొత్త వైరస్ దేశీయ సైబర్‌స్పేస్‌లో హల్‌చల్ చేస్తోంది. గతేడాది చివర్లో అమెరికా-ఉత్తర కొరియాల మధ్య మాటలయుద్ధానికి దారితీసిన వివాదాస్పద హాలీవుడ్ చిత్రం ‘ద ఇంటర్వ్యూ’ పేరిట స్మార్ట్‌ఫోన్లలోకి చొరబడేందుకు ప్రయత్నిస్తోంది. ఇంటర్నెట్ యూజర్లు ఎవరైనా తమ స్మార్ట్‌ఫోన్ల ద్వారా ఈ చిత్రం ఉచిత డౌన్‌లోడ్ లింక్‌ను క్లిక్ చేస్తే ట్రోజన్ తరహా వైరస్ ఫోన్లోకి చొరబడి వారి వ్యక్తిగత సమాచారాన్ని తస్కరిస్తుంది. అందువల్ల ఈ వైరస్ విషయంలో జాగ్రత్తగా ఉండాలని దేశీయ సైబర్ భద్రతా పరిరక్షణ నోడల్ ఏజెన్సీ కంప్యూటర్ ఎమర్జెన్సీ రెస్పాన్స్ టీమ్ ఆఫ్ ఇండియా (సెర్ట్-ఇన్) తాజా మార్గదర్శకాల్లో సూచించింది.

ఉత్తర కొరియా అధినేత కిమ్ జాంగ్ ఉన్‌ను హతమార్చే కాల్పనిక కథాంశంతో సోనీ పిక్చర్స్ ఈ చిత్రాన్ని తెరకెక్కించడంపై వివాదం రేగడం, సినిమా విడుదలకు ముందే అమెరికాలోని సోనీ పిక్చర్స్ ప్రధాన కార్యాలయంపై సైబర్ దాడి జరిగి చిత్రం ఇంటర్నెట్‌లో లీక్ కావడం తెలిసిందే. ఇందుకు ఉత్తర కొరియానే కారణమని అమెరికా ఆరోపించగా ఆ ఆరోపణలను ఉత్తర కొరియా ఖండించింది. ఈ నేపథ్యంలో సినిమా హాళ్లలో ఈ చిత్రం విడుదలను రద్దు చేసుకున్న సోనీ కేవలం కొన్ని కళా కేంద్రాల థియేటర్లు, ఇంటర్నెట్‌లో దీన్ని విడుదల చేసింది.

జి మనోహర్