సిద్దరామయ్యకు తృటితో తప్పిన పెను ప్రమాదం..

Posted: 01/10/2015 03:16 PM IST

కర్ణాటక ముఖ్యమంత్రి సిద్ధరామయ్యకు ఓ పెను ప్రమాదం తప్పింది. హెలికాప్టర్ పైలట్ అప్రమత్తంగా ఉండటంతో సిద్దరామయ్యను పెను ప్రమాదం నుంచి తప్పించారు. వివరాల్లోకి వెళ్తే.. ఇవాళ మధ్యాహ్నం కర్నాటక ముఖ్యమంత్రి సిద్దరామయ్య రాజధాని బెంగుళూరు నుంచి మైసూరుకు బయలుదేరాల్సి వుంది. దీంతో ఆయన  హెలికాప్టర్‌లో వెళ్లేందుకు సిద్ధమయ్యారు. హెలికాప్టర్‌లో కూర్చోగానే అకస్మాత్తుగా మంటలు చెలరేగాయి.

మంటల్ని గుర్తించిన పైలట్, భద్రతాధికారులు హుటాహుటిన సిఎం సిద్ధరామయ్యను కిందకు దించేశారు. పైలట్ అప్రమత్తంగా ఉండటం వల్ల పెను ప్రమదం తప్పిందని అధికారులు వెల్లడించారు.ఈ ఘటనలో ఎవరికీ ఎలాంటి గాయాలు కాలేదు. దీంతో అధికారులు ఊపిరిపీల్చుకున్నారు. ప్రమాదానికి గల కారణాలు తెలియాల్సి ఉంది. అయితే ఇటీవలే కేంద్ర హోం మంత్రి రాజ్ నాథ్ సింగ్ ప్రయాణిస్తున్న విమానం కూడా ఇలాగే సాంకేతిక కారణాలతో మొరయించడంతో అప్రమత్తంగా వున్న ఫైలెట్ హుటాహుటిన కిందకు దించిన విషయం తెలిసిందే.

కాగా, ప్రభుత్వాధినేతలు, కేంద్ర మంత్రులు ఉపయోగించే హెలికాప్టర్లకు ఇలాంటి ప్రమాదాలు జరగడం ఆందోళన చెందాల్సిన విషయమే. ఇప్పటికే హెలికాప్టర్ ప్రమాదాల కారణంగా ఇద్దరు ముఖ్యమంత్రులను భారత్ పోగొట్టుకున్న తరువాత కూడా కేంద్ర ప్రభుత్వం వీటిపై దృష్టిసారించడం లేదు. సమైఖ్య రాష్ట్ర ముఖ్యమంత్రి వైఎస్ రాజశేఖర్ రెడ్డి సహా దోర్జిఖండులను దేశం హెలికాప్టర్ ప్రమాదాలలో పొగోట్టుకుంది. ఇప్పటికైనా ఈ ప్రమాదాలను నివారించడంపై కేంద్రం దృష్టి సారించాల్సిన అవసరం ఎంతైనా వుంది.

జి.మనోహర్