‘లింగా’ సినిమా చూస్తూ అభిమాని మృతి

Posted: 12/27/2014 07:54 AM IST

రజినీకాంత్ వీరాభిమాని ఒకరు సూపర్ స్టార్ సినిమా చూస్తూనే చనిపోయిన ఘటన తమిళనాడులో జరిగింది. కోయంబత్తూరు సమీపంలోని చెట్టిపాళ్యంకు చెందిన రాజేంద్రన్ (58) అనే వ్యాపారి రజినీకి వీరాభిమాని.  క్యాన్సర్ తో బాధపడుతున్న ఈయన చికిత్స తీసుకుంటున్నారు. డాక్టర్లు ఇంటినుంచి బయటకు వెళ్లవద్దని చెప్పారు. అయితే అభిమాన హీరో సినిమా విడుదల కావటంతో.., సినిమా చూడాలని ఉన్నట్లు కుటుంబ సభ్యులకు చెప్పాడు. వారు వద్దని సూచించారు. కుటుంబ సభ్యుల మాట వినకుండా శుక్రవారం రాత్రి ఇంట్లోంచి వచ్చి.., బస్సు ఎక్కి కోయంబత్తూరు చేరుకున్నాడు.

స్థానికంగా సినిమా ఆడుతున్న శాంతి థియేటర్ లో సెకండ్ షో టికెట్ తీసుకున్నాడు. సినిమా అంతా పూర్తయ్యాక.., అర్ధరాత్రి 1.25 సమయంలో థియేటర్ క్లీనింగ్ కోసం హాలులోకి వచ్చిన సిబ్బంది. రాజేంద్రన్ కుర్చీలో ఉండటం గమనించి... నిద్రపోయినట్లు భావించారు. దగ్గరకు వచ్చి పిలిచినా లేవకపోవటంతో.., చేయితో తట్టారు. ఎంత ప్రయత్నించినా.. కళ్లు తెరవకపోవటంతో థియేటర్ యజమానికి సమాచారం ఇచ్చారు. మృతుడిని పరిశీలించిన మేనేజర్ పోలిసులకు సమాచారం అందించాడు. ఘటనాస్థలికి వచ్చిన పోలిసులు... రాజేంద్రన్ ను చూసి చనిపోయినట్లు ధృవీకరించారు. మృతదేహాన్ని కోయంబత్తూరు మెడికల్ కాలేజి ఆస్పత్రికి తరలించారు.

సెలైన్ ఎక్కించేందుకు నరానికి పెట్టే డ్రిప్ ట్యూబ్ రాజేంద్రన్ చేతికి ఉండటంతో.., చికిత్స మద్యలోనే సినిమా చూసేందుకు వచ్చినట్లు తెలుస్తోంది. అటు ఇంటర్వెల్ సమయంలో రాజేంద్రన్ చాలా ఉల్లాసంగా ఉన్నాడనీ.., పాప్ కార్న్ కూడా తెచ్చుకుని తినటం చూశానని థియేటర్ మేనేజర్ కర్నన్ తెలిపాడు. కుటుంబ సభ్యులు మృతదేహం స్వాధీనం చేసుకున్నారు. అటు పోలిసులు అనుమానాస్పద మృతిగా కేసు నమోదు చేసి ధర్యాప్తు చేస్తున్నారు.

 

 

కార్తిక్