పడగలతో శిశువుకి నీడనిచ్చిన పాములు- వింత దృశ్యం

Posted: 07/17/2014 10:59 AM IST

అది భారతదేశంలోని గ్రామంలో జరిగిన వింత.  దాన్ని కేమెరా లెన్స్ వీడియో రూపంలో బంధించింది.  

మంచం మీద శిశువు నిద్రిస్తుంటే నాలుగు పాములు పడగవిప్పి ఆ బాలుడికి ఎండపడకుండా చూస్తున్నాయి.  భారత దేశంలోని జానపద కథల్లో ఇలాంటి సన్నివేశాలను చెప్పటం జరిగింది.  చిన్న పిల్లవాడు సేదతీరుతుంటే ఒక నాగు పాము అతనికి ఎండతగలకుండా పడగవిప్పి ఉండటం చూసిన సాధువు ఆ బాలుడు గొప్ప జాతకుడవుతాడని, మహారాజ యోగం ఉందని చెప్తాడు.  

అలాగే కలియుగ దైవంగా భావించే తిరుమలేశుడి కథలో పడగవిప్పిన పాముని కొట్టబొయి వేంకటేశ్వరుని తల మీద కొట్టిన ఉదంతాన్ని చెప్తారు.  ప్రకృతితోను, జంతువులతోను మానవుల సహజీవనాన్ని పూర్వకాలం కథలు కథలుగా చెప్పేవారు.  మానవులతోపాటుగా జీవించే జంతువులు పక్షులు ఆ మానవులను స్నేహితుల్లా చూసి సాయం చేసేవే కానీ, తిండి పెడుతున్న యజమానిలా చూసేవి కావు.  అందువలన మనిషి ఆజ్ఞాపించి సైగలు చెయ్యకుండానే అతని ఉద్దేశ్యాన్ని, అవసరాన్ని కనిపెట్టి సాయం చెయ్యటాన్ని చిన్నప్పటి నుంచీ కథల రూపంలో కానీ సంఘటనల రూపంలో కానీ వింటూ వస్తున్నాం.  

ఈ వీడియోలో కూడా ఎవరో ఆజ్ఞాపిస్తే చేసిన సేవలు కావవి.  కాకపోతే వాటి కోరలు తీసేసి ఉంటారేమో అంటున్నారు.  కోరలు తీసినంత మాత్రాన ఎండకి గొడుగు పట్టినట్టుగా పడగలు విప్పనవసరం లేదు కదా.

-శ్రీజ