సుప్రీం కోర్టులో రాష్ట్ర విభజన బిల్లు మీద పిటిషన్లు

Posted: 02/17/2014 02:28 PM IST

మరోసారి సుప్రీం కోర్టు రాష్ట్ర విభజన బిల్లు మీద పిటిషన్లను కొట్టివేసింది.  ఈ రోజు మధ్యాహ్నం సుప్రీం కోర్టుకి విచారణకు వచ్చిన మూడు పిటిషన్లను ఒకేసారి విచారించిన సుప్రీం కోర్టు పోయినసారి లాగానే ఇప్పుడు దీనిమీద కోర్టు తీర్పు తొందరపాటు చర్య అవుతుందని పేర్కొంది.

బిల్లును పార్లమెంటులో ప్రవేశపెట్టనంత వరకు చెప్పిన మాటలనే సుప్రీం కోర్టు మరో సారి చెప్పింది.  హేతుబద్దంగా చూస్తే రాష్ట్ర విభజన బిల్లును పార్లమెంటులో ఇంకా ప్రవేశపెట్టారా లేదా అన్నది కూడా  చర్చనీయాంశంగా మారింది.  అలాంటిది దాని మీద చర్చ జరగలేదు, విభజన బిల్లుకి ప్రభుత్వం సరేనని తలాడించలేదు. 

కాబట్టి సరైన సమయంలో మరోసారి పిటిషనర్లు కోర్టుని ఆశ్రయించవచ్చని సుప్రీం కోర్టు తెలియజేసింది.  ప్రస్తుతం  ఈ అంశం పార్లమెంటులో ఉందన్నది కోర్టు పరిశీలన.  అయితే తీరా బిల్లు పాసయిన తర్వాత అది చట్టబద్ధమైన తర్వాత కోర్టు ఏం చెప్తుందన్నది ఆసక్తికరంగా మారింది. 

-శ్రీజ