Posted: 09/28/2012 11:43 AM IST

 ఈ నెల 30న జరిగే 'తెలంగాణ మార్చ్'కు బీజేపీ కాపలా ఉంటుందని, ఎలాంటి విధ్వంసం జరగకుండా చూస్తుందని ఆ పార్టీ రాష్ట్ర అధ్యక్షుడు జి.కిషన్‌రెడ్డి భరోసా ఇచ్చారు. పోలీసులు, ప్రభుత్వం తమ కవ్వింపు చర్యలు మానుకోవాలని ఆయన హితవు పలికారు. అరెస్టులు, అడ్డుకోవడాలతో మార్చ్‌ను గందరగోళంలోకి నెట్టవద్దని విజ్ఞప్తి చేశారు. గురువారం ర్టీ కార్యాలయంలో పార్టీ నేతలు బండారు దత్తాత్రేయ, టి.రాజేశ్వర్‌రావు, కె.రాములు, ఎన్వీఎస్ఎస్ ప్రభాకర్ తదితరులతో కలిసి ఆయన విలేకరులతో మాట్లాడారు.ఇప్పటికే జిల్లాల్లో పోలీసులు తెలంగాణ ఉద్యమకారులు, బీజేపీ నేతలను అరెస్టు చేస్తున్నారని ఆరోపించారు. మతహింస చెలరేగుతుందని, విధ్వంసం జరుగుతుందని, సీమాంధ్ర ప్రజలపై దాడులు జరుగుతాయంటూ ప్రభుత్వం, పోలీసులు ప్రచారం చేస్తున్నారని తెలిపారు. ఒక పక్క ఇలాంటి దుష్ప్రచారాన్ని సాగిస్తూనే మరో పక్క మార్చ్‌ను వాయిదా వేసుకోవాలంటూ సర్కారు సన్నాయి నొక్కులు నొక్కుతోందని ధ్వజమెత్తారు. నిజానికి ఎలాంటి విధ్వంసకర పరిస్థితులు తలెత్తవని, పోలీసులు అత్యుత్సాహంతో ఉద్యమకారులను రెచ్చగొడుతున్నారని ఆరోపించారు.తెలంగాణ ప్రజలుగాని, సీమాంధ్ర ప్రజలుగాని భయపడాల్సిన అవసరం లేదని.. ఎలాంటి దాడులకు ఆస్కారం లేదని భరోసా ఇచ్చారు. ఇలాంటి చర్యలకు తమ పార్టీ పూర్తి వ్యతిరేకమని ప్రకటించారు. తమ పార్టీ నేతలంతా ట్యాంక్‌బండ్‌పైకి చేరుకుని, మార్చ్ ప్రశాంతంగా జరిగేలా చూస్తారని ఆయన వెల్లడించారు. కాంగ్రెస్ పార్టీ ఈ నెల 30లోపు ఏదైనా సానుకూల ప్రకటన చేస్తేనే మార్చ్‌ను వాయిదా వేసుకునే అవకాశం ఉందన్నారు. తెలంగాణ మంత్రులకు ఏదైనా అలజడి ప్రారంభమైతేనే తెలంగాణ అంశం గుర్తుకు వస్తుందని.. వారివన్నీ మీటింగులు, ఈటింగులే తప్ప సాధించిందేమీ లేదని కిషన్‌రెడ్డి ఎద్దేవా చేశారు.