Posted: 08/30/2012 04:10 PM IST

అదొక దొంగ కుటుంబం! ఆ ఫ్యామిలీలో తల్లి.. తండ్రి.. కొడుకు.. అందరూ చోరశిఖామణులే!! బస్టాండులు, రద్దీ ప్రదేశాలే వారి కార్యక్షేత్రాలు! ప్రయాణికుల్ని ఏమార్చి చేతివాటం ప్రదర్శించడం వారికి వెన్నతో పెట్టిన విద్య!! ఆ విద్యతో వారు సంపాదించిన ఆస్తులు రెండు కోట్లకు పైమాటే! గుంటూరుజిల్లా తాడేపల్లికి చెందిన మానుపాటి మంగమ్మ (35) అండ్ ఫ్యామిలీ చోరచరిత్ర ఇది. మంగమ్మ, ఆమె భర్త ఆదినారాయణ (40), కుమారుడు మనోహర్ (19)లు గత పదేళ్లుగా గుంటూరుజిల్లాలోనూ హైదరాబాద్‌లోనూ చోరీలు చేస్తూ జీవనం సాగిస్తున్నారు. వివిధ పోలీస్‌స్టేషన్లలో 57 కేసులున్న మాయలాడి మంగమ్మ.. ఈ నెల 17న విజయవాడ రహదారిపై వాహనాలను తనిఖీ చేస్తున్న పోలీసులకు దొరికిపోయింది.ఆమెను అరెస్టు చేసిన పోలీసులు కోర్టులో హాజరుపరిచి రిమాండ్‌కు తరలించారు.

చోరీల ద్వారా సేకరించిన సొమ్మునంతా ఈ ఫ్యామిలీ ఐదు బ్యాంకుల్లో భద్రపరిచినట్లు తెలుసుకున్న పోలీసులు ఆమెను కస్టడీకి ఇవ్వాల్సిందిగా కోర్టును కోరారు. కస్టడీలో ఆమెను విచారించిన పోలీసులకు కళ్లు బైర్లు కమ్మినంత పనైంది! ఆమె ఆస్తుల వివరాలు తెలిశాక దిమ్మతిరిగి మైండ్ బ్లాకయ్యింది! పదేళ్ల చోర వృత్తితో ఈ కుటుంబం.. కిలో బంగారం పోగేసింది! ఐదు బ్యాంకు ఖాతాల్లో రూ.37 లక్షలు కూడబెట్టింది.మరో రూ.30 లక్షలు అధిక వడ్డీలకు అప్పులిచ్చింది. అంతేనా.. ఇంకో రూ.10 లక్షలు ఫిక్స్‌డ్ డిపాజిట్ల రూపంలో బ్యాంకుల్లో భద్రపరిచింది. ఇక్కడితో అయిపోలేదు.. వీరికి పది ప్లాట్లు కూడా ఉన్నాయని విచారణలో తేలింది. ఇందుకు సంబంధించిన పత్రాలన్నీ బ్యాంకులాకర్లలో దొరికాయి. వీటన్నిటినీ పోలీసులు స్వాధీనం చేసుకున్నారు. కాగా.. మంగమ్మను పోలీసులు అరెస్టు చేయగానే కోర్టును ఆశ్రయించిన తండ్రీకొడుకులు ప్రస్తుతం పరారీలో ఉన్నారు. పోలీసులు వీరికోసం ముమ్మరంగా గాలిస్తున్నారు.