Posted: 07/01/2012 01:51 PM IST

       మొదటి నుంచి రాష్ట్ర్ర విభజనకు వ్యతిరేకంగా ఉన్న విజయవాడ ఎంపీ లగడపాటి రాజగోపాల్ మరోసారి తీవ్ర వ్యాఖ్యలు చేశారు. రాష్ట్ర్ర విభజన అంటూ జరిగితే నీటి యుద్ధాలు తప్పవని హెచ్చరించారు. తన కూతురు పిల్లల పుట్టు వెంట్రుకలు ఇవ్వడం కోసం తిరుమల వచ్చిన లగడపాటి ఈ వ్యాఖ్యలు చేశారు. రాష్ట్రంలో ఏ రాజకీయ పార్టీ కూడా స్పష్టమైన అభిప్రాయం చెప్పే పరిస్థితిలో లేవని లగడపాటి అన్నారు. నీటి సమస్యలు తలెత్తకుండా ఉండాలంటే రాష్ట్రం సమైక్యంగా ఉండాలని, కేంద్ర ప్రభుత్వం కూడా అదే దిశగా ఆలోచన చేస్తుందని ఆయన చెప్పారు. తెలంగాణపై ఏదో ఒక నిర్ణయం ఆగస్టులో వస్తుందని... కేంద్ర హోంమంత్రి చిదంబరం వ్యాఖ్యలే ఇందుకు నిదర్శనమన్నారు. రాజ్యసభ సభ్యుడు చిరంజీవికి త్వరలోనే కేంద్ర మంత్రి పదవి వస్తుందన్నారు.  నాగార్జున సాగర్ డ్యామ్ నుంచి నీటిని కృష్ణా డెల్టా రైతాంగానికి విడుదల చేయకూడదంటూ తెలంగాణ ప్రాంత నేతలు చేస్తున్న వివాదం అర్థరహితమని... సాగర్ జలాలను వాడుకునే హక్కు, స్వేచ్ఛ కృష్ణా డెల్టా ప్రాంత రైతులకు ఉందని లగడపాటి అన్నారు. సీబీఐ జేడీ లక్ష్మీనారాయణ మొబైల్ కాల్ లిస్టు వ్యవహారంలో వైఎస్ఆర్ కాంగ్రెస్ పార్టీ నేతలు కౌరవుల పాత్రను పోషిస్తున్నారని లగడపాటి రాజగోపాల్ ఆరోపించారు.

...avnk