Posted: 01/17/2012 11:23 AM IST

మెదక్ జిల్లా హైద్రాబాద్ కి పెద్ద దూరమూ కాదు, కొత్త పథకాలను ప్రవేశపెడుతూ తెలంగాణా లో కాలుపెట్టినట్టూ ఉంటుంది, పైగా గతం లో కూడా పథకాల విషయంలో మెదక్ రాజకీయనాయకులకు బాగా అచ్చొచ్చింది. గతంలో తెలుగుదేశం పార్టీ అధ్యక్షుడు చంద్రబాబు నాయుడు, కాంగ్రెస్ హయాంలో వైయస్ రాజశేఖరరెడ్డి కూడా మెదక్ జిల్లా నుంచే పథకాలు, కొత్త కార్యక్రమాల బోణీ చేసారు.

అదే పంథాలో ప్రస్తుత ముఖ్యమంత్రి కిరణ్ కుమార్ కూడా ఈ రోజు నుంచి చిన్న గొట్టిముక్కుల లో రెవిన్యూశాఖతో కలిసి సదస్సులను ప్రారంభించి ఇదే విధంగా మార్చి వరకూ అన్ని గ్రామాల్లో నిర్వహించనున్నారు. ఈ కార్యక్రమానికి రెవిన్యూ శాఖలో తహసీల్దార్ ఆధ్వర్యంలో గ్రామగ్రామాలకూ పోయి అక్కడ ఉన్న భూ సమస్యలను సమీకరించి, వాటిని పరిష్కరించటానికి రెవిన్యూ యంత్రాంగం కృషిచేస్తుంది. ఇది కాకుండా భూమి-పౌరసేవలు అని నామకరణం చేసిన కార్యక్రమం కూడా చిన గొట్టిముక్కల నుండి ప్రారంభమౌతోంది. ఈ కార్యక్రమంలో భూములకు సంబంధించిన సర్టిఫికేట్లతో పాటు తహసీల్దార్ కార్యాలయం నుంచి పొందే వివిధ సర్టిఫికేట్లనూ- ఆదాయం, రెసిడెన్షియల్, ఓబిసి, ఇబిసి, ఓటర్ గుర్తింపు కార్డ్ ఇత్యాది సేవలను నిర్ణీత గడువులో జారీ చేస్తారు. అలా చెయ్యటంలో విఫలమైన రెవిన్యూ సిబ్బంది మీద జరిమానాలు కూడా విధించాలని ప్రభుత్వం యోజన చేస్తోంది.

అలాగే పాల ప్రగతి కార్యక్రమంకూడా ఇక్కడి నుంచే ప్రారంభిస్తున్నారు. అందులో గ్రామస్థాయిలో పోషక విలువులగల పాలను సరఫరా చెయ్యటమే లక్ష్యంగా ఈ కార్యక్రమాన్ని నిర్వహించబోతున్నారు. ముందుగా 756 గ్రామాల్లో 3024 ఈ పాల ప్రగతి కేంద్రాలను ప్రారంభిస్తారు.

-శ్రీజ