అభయ గోల్డ్ ఎండీ చిత్రహింసలు?

Posted: 05/27/2013 04:13 PM IST

అభయ గోల్డ్ ఎండీ శ్రీనివాస్‌ను మూడు రోజులుగా అక్రమంగా గవర్నరుపేట, సూర్యారావుపేట పోలీసులు నిర్బంధించి చిత్రహింసలకు గురిచేస్తూ బలవంతంగా తప్పుడు సమాచారాలు తీసుకొంటున్నారని పోలీసుల అదుపులో వున్న శ్రీనివాస్, ఆయన భార్యను వెంటనే కోర్టులో హాజరుపరిచేలా చర్యలు తీసుకోవాలంటూ ప్రముఖ న్యాయవాది కిలారు బెనర్జీ వేసిన పిటీషన్‌పై చీఫ్ మెట్రోపాలిటన్ మెజిస్ట్రేట్ శ్రీనివాసమూర్తి సెర్చ్ వారెంట్ జారీ చేశారు. కోర్టులో న్యాయవాది బెనర్జీ వేసిన పిటీషన్‌పై న్యాయమూర్తి కోర్టు కమిషనర్‌ను నియమిస్తూ వెంటనే శ్రీనివాస్, అతని భార్యను పై రెండు స్టేషన్‌లలో వెతికి కోర్టుకు నివేదిక అందచేయాలని ఆదేశించారు.

పిటీషన్‌లో న్యాయవాది బెనర్జీ పేర్కొన్న వివరాలు ఇలా వున్నాయి. మూడు రోజులుగా అభయ గోల్డ్ ఎండీ శ్రీనివాస్, అతని భార్య అంబికను పోలీసులు అక్రమంగా నిర్బంధించి చిత్రహింసలకు గురిచేస్తున్నారని తెలిపారు. గతంలో ఆమెకు రెండుసార్లు ఆపరేషన్లు జరిగిన నేపథ్యంలో ప్రస్తుతం గర్భవతిగా వున్న ఆమెకు మెడికల్ చెకప్ కోసం ఈనెల 20న హైదరాబాద్ తీసుకెళ్లగా 23న పోలీసులు అదుపులోకి తీసుకున్నారని పేర్కొన్నారు. తొలుత నగరంలోని ఎగ్జిక్యూటివ్ క్లబ్‌లో వుంచి శ్రీనివాస్, అంబికల పట్ల పోలీసులు విచక్షణా రహితంగా ప్రవర్తించడంతో ఆమె పరిస్థితి విషమించిందని పేర్కొన్నారు. దీంతో పోలీసులు హరిణి గ్య్రాస్ట్రో ఎంట్రాలజీలో ఆమెను ఇన్‌పేషెంట్‌గా జాయిన్ చేసి చికిత్సలు చేయించారని తెలిపారు. శ్రీనివాస్‌కు ఒంటినిండా గాయాలున్నాయని, సంస్థకు మొత్తం బాకీలు కలిపి రెండు కోట్ల రూపాయల వరకు కూడా లేవని, అయితే రూ.60 నుంచి 70 కోట్ల వరకు ఆస్తులున్నాయని పిటీషన్‌లో తెలిపారు.