నాగశౌర్య

Posted: 03/10/2015 02:57 PM IST

‘ఊహలు గుసగుసలాడే’ సినిమాతో నటుడిగా మంచి గుర్తింపు సాధించిన యువహీరో నాగశౌర్య.. ఆ తర్వాత ‘దిక్కులు చూడకు రామయ్య’, ‘లక్ష్మీరావే మా ఇంటికి’ వంటి సినిమాలతో క్లాసిక్ హిట్స్ సాధించాడు. దాంతో ఈ నటుడికి క్లాస్ హీరోగా ముద్రపడింది. అయితే.. ఆ ఒక్క ఇమేజ్ తోనే ఇండస్ట్రీలో ముందుకు సాగలేమన్న విషయాన్ని గుర్తించిన ఈ నటుడు.. ఇప్పుడు సరికొత్త తరహా కథతో ప్రేక్షకులను అలరించేందుకు సిద్ధమయ్యాడు.

ఇటీవలే యువహీరోలందరూ ప్రయోగాత్మక కథలతో ప్రేక్షకులను అలరిస్తున్నారు. దాంతో వారికి మంచి ఇమేజ్ రావడంతోపాటు వారి సినిమాలకు కలెక్షన్లు కూడా బాగానే వస్తాయన్న నమ్మకం! అటువంటి హీరోల జాబితాలోకి ఇప్పుడు హీరో నాగశౌర్య కూడా చేరిపోయాడు. మొన్నటివరకు ఫ్యామిలీ కథాచిత్రాలతో ప్రేక్షకులను అలరించిన ఈ హీరో.. ఇప్పుడు మాస్ ఎంటర్ టైన్ మెంట్ కథతో ముందుకు వచ్చేందుకు సన్నద్ధమవుతున్నాడు.

నాగశౌర్య హీరోగా ‘చింతకాయల రవి’ ఫేం దర్శకుడు యోగేష్ దర్శకత్వంలో ‘జాదూగాడు’ చిత్రం రూపొందుతోంది. ‘సత్య ఎంటర్టైన్మెంట్స్’ పతాకంఫై వి.వి.యన్.ప్రసాద్ ఈ మూవీని నిర్మిస్తున్నారు. ఇందులో ‘హర హర మహాదేవ’ సీరియల్ లో పార్వతి గా నటించిన ‘సోనారిక’ ఈ చిత్రం ద్వారా కథానాయికగా తెలుగు తెరకు పరిచయం అవుతున్నారు. ఇప్పటికే ఈ మూవీ షూటింగ్ పూర్తికాగా.. త్వరలోనే విడుదలకు సిద్ధంగా వుంది.

చిత్ర దర్శకుడు ‘యోగేష్’ మాట్లాడుతూ..’ కధానాయకుడు నాగశౌర్య ఇప్పటివరకు ప్రేమ కధా చిత్రాల నాయకుడిగా నటించారు. కానీ ఈ చిత్రంలో అతని పాత్ర గతచిత్రాలకు భిన్నంగా ఉంటుంది. మాస్ ప్రేక్షకులను సైతం ఆకట్టుకునే విధంగా ఈ చిత్రంలో కధానాయకుడి పాత్రను తీర్చిదిద్దడం జరిగిందని తెలిపారు. ఏప్రిల్ లో ఈ మూవీని విడుదల చేయనున్నట్లు ఆయన వెల్లడించారు. మరి.. నాగశౌర్య ఈ మాస్ లుక్ ప్రేక్షకులకు నచ్చుతుందో లేదో.. రిలీజ్ అయ్యేవరకు వేచి చూడాల్సిందే!