అక్కినేని నాగార్జున

Posted: 03/07/2015 03:07 PM IST

టాలీవుడ్ మన్మథుడు నాగార్జున గతకొన్నాళ్ల నుంచి మూవీలకు దూరంగా వుంటూ ‘మీలో ఎవరు కోటీశ్వరుడు’ షోతో బుల్లితెరకే పరిమితమైన విషయం తెలిసిందే! అప్పట్లో ఆయన వరుస పరాజయాలను చవిచూసిన నేపథ్యంలో సినిమాలకు కాస్త గ్యాప్ తీసుకున్నారు. చివరికి తాను అనుకున్నట్లుగానే మంచి స్ర్కిప్టు దొరకడంతో ఆయన రెండు సినిమాలకు ఓకే చేశారు. అందులో ఒకటి ‘సోగ్గాడే చిన్ని నాయన’ కాగా, మరొకటి కార్తీతో కలిసి మల్టీస్టారర్ మూవీలో నటిస్తున్నారు.

ఇదిలావుండగా.. ‘సోగ్గాడే చిన్ని నాయన’ సినిమాలో నాగార్జున ద్విపాత్రాభినయం చేస్తున్నారు. నూతన దర్శకుడు కల్యాణ్ కృష్ణ దర్శకత్వంలో తెరకెక్కుతున్న ఈ చిత్రంలో నాగ్ తాత, మనవడిగా రెండు పాత్రలు పోషిస్తున్నారు. ఒక పాత్ర సరసన రమ్యకృష్ణ నటిస్తుండగా.. యంగ్ పాత్ర సరసన ‘అందాలరాక్షసి’ ఫేం లావణ్య త్రిపాఠీ నటిస్తోంది. అన్నపూర్ణ స్తూడియోస్ ఈ చిత్రాన్ని నిర్మిస్తోంది.

ప్రస్తుతం శరవేగంగా షూటింగ్ జరుపుకుంటున్న ఈ మూవీ యూనిట్ మైసూర్ కి షిఫ్ట్ అయ్యింది. అక్కడ కొన్ని కీలకమైన సన్నివేశాలను చిత్రీకరిస్తున్నారు. నాగ్ తో పాటు ప్రధాన తారాగణమంతా ఈ షూటింగులో పాల్గొంటున్నారు. ఇకపోతే ఈ సినిమాలో నాగ్, హీరోయిన్లకు మధ్య కొన్ని రొమాంటిక్ సన్నివేశాలు కూడా వున్నాయని అంటున్నారు. త్వరలోనే మరిన్ని వివరాలు వెలువడి కానున్నాయి.