బోయపాటి కథను మార్చేయమన్న మహేష్

Posted: 02/05/2018 06:15 PM IST

బ్యాక్ టూ బ్యాక్ 'బ్రహ్మోత్సవం' .. 'స్పైడర్' సినిమాలు భారీ పరాజయాలను తెచ్చిపెట్టడంతో, తరువాత ప్రాజెక్టులపై మహేశ్ బాబు ప్రత్యేక శ్రద్ధ పెట్టాడనే టాక్ ఫిల్మ్ నగర్లో వినిపిస్తోంది. ఈ కారణంగానే 'భరత్ అనే నేను'లో మార్పులు చేర్పులు జరుగుతున్నాయనీ, వంశీ పైడిపల్లి ప్రాజెక్టుకి సంబంధించిన స్క్రిప్ట్ పై గట్టిగా కసరత్తు జరుగుతోందని అంటున్నారు.

ఆపై 26వ చిత్రానికి సంబంధించి ఓ అప్ డేట్ కూడా అందుతోంది. బోయపాటి శ్రీను డైరెక్షన్ లో మహేశ్ బాబు చిత్రం ఉండబోతుందని ఓ వార్త గత కొంతకాలంగా వినిపిస్తోంది. అయితే లైన్ విన్న తరువాత విషయాన్ని ఎంత మాత్రం నాన్చకుండా, తనకి నచ్చలేదని మహేశ్ బాబు తేల్చి చెప్పేశాడని అంటున్నారు. ప్రస్తుతం వినిపించిన కథకు రిపేర్లు చేసే ప్రయత్నాలు చేయకుండా, కొత్తగా ఏదైనా లైన్ అనుకుని రమ్మని చెప్పాడట.

దాంతో బోయపాటి శ్రీను ఆ దిశగా తన కసరత్తును మొదలెట్టాడని చెబుతున్నారు. తన దగ్గరకు వచ్చే దర్శకులకు ఇకపై మొహమాటం లేకుండా సినిమాలపై తన అభిప్రాయం చెప్పటం మంచిదేనన్న చర్చ ఫిల్మ్ నగర్ లో మొదలైంది.