మళ్లీ తెరపైకి రవితేజ రెమ్యునరేషన్

Posted: 02/06/2018 05:10 PM IST

టాలీవుడ్ రవితేజ రెమ్యునరేషన్ గురించి మరోసారి హాట్ టాపిక్ మొదలైంది. గతంలో బెంగాల్ టైగర్ టైంలో దిల్ రాజు చిత్రాన్ని రెమ్యునరేషన్ కారణంగా వదిలేసుకున్నాడు. ఆపై రెండేళ్లపాటు సినిమాలకు దూరంగా ఉన్న మాస్ మహారాజ్.. అందుకు కారణం రెమ్యునరేషనే అంటూ గుసగుసలు వినిపించాయి. ఈ వార్తలో ఎంత వరకు నిజమో తెలీదుగానీ మళ్లీ ఇప్పుడు ఆ టాపిక్ తెరపైకి వచ్చింది.

ఆ మధ్య రవితేజ సినిమాలు అంతగా ప్రేక్షకాదరణ పొందకపోవడంతో, ఆయన తన పారితోషికాన్ని తగ్గించుకోవాలంటూ నిర్మాతలు డిమాండ్ చేశారు. చాలా రోజుల పాటు ఈ విషయంలో పట్టువీడని రవితేజ, ఆ తరువాత పారితోషికం తగ్గించుకుని 'రాజా ది గ్రేట్' సినిమా చేశాడు. ఈ సినిమా రవితేజకి సక్సెస్ ను ఇవ్వడంతో పాటు, ఆయన అభిమానులకు ఎంతో సంతృప్తిని ఇచ్చింది. దాంతో మళ్లీ రవితేజ తన పారితోషికాన్ని పెంచేశాడు. అలా పెంచేసిన పారితోషికంపైనే 'టచ్ చేసి చూడు' సినిమా చేశాడు.

విక్రమ్ సిరికొండ డెబ్యూ డైరెక్టర్ తో చేసిన ఈ చిత్రం తొలి ఆటకే చేతులెత్తేసింది. కలెక్షన్ల పరంగా కూడా దారుణమైన నష్టాలనే తీసుకొచ్చేలా కనిపిస్తోంది. ఈ నేపథ్యంలో తన తర్వాతి చిత్రాల కోసం పారితోషకం తగ్గించుకోవాలని నిర్మాతలు సూచిస్తున్నారంట. మరి రవితేజ ఈసారి మెట్టు దిగుతాడో .. లేదో చూడాలి.