బాహుబలి-2 సీన్లు లీక్ అయ్యాయా?

Posted: 04/25/2017 01:23 PM IST

విజువల్ వండర్ 'బాహుబలి-2' సినిమా కోసం సినీ అభిమానులు వెయ్యి కళ్లతో ఎదురు చూస్తున్నారు. ఏప్రిల్ 28వ తేదీన (శుక్రవారం) అంటే మరో మూడు రోజుల్లో భారీ ఎత్తున రిలీజ్ చేయడానికి దర్శకనిర్మాతలు సర్వం సిద్ధం చేసుకున్నారు. ఏప్రిల్ 27న (గురువారం) సాయంత్రం ఓవర్ సీస్ ప్రీమియర్ షోలతో ఈ సినిమా రిలీజ్ కానుందని యూనిట్ సభ్యులు చెబుతున్నారు. అయితే, ఇప్పుడు ఓ షాకింగ్ వార్త హల్ చల్ చేస్తోంది.

ఈ చిత్రానికి సంబంధించిన కొన్ని ఫోటోలు నెట్ లో దర్శనమివ్వటంతో సీన్లు లీక్ అయ్యాయన్న వార్తలు చక్కర్లు కొడుతున్నాయి. టైటిల్ లోగోతోపాటు, శివుడు ఫైట్ సీన్ కు సంబంధించిన ఫోటోలు అందులో ఉన్నాయి. ఈ లెక్కన సినిమాలోని కొన్ని సీన్లు బయటికి వచ్చేశాయన్న వార్త హల్ చల్ చేస్తోంది. అయితే రష్యాకు చెందిన టెక్నాలజీతో చాలా సేఫ్ గా సినిమాకు సంబంధించిన డేటాను భద్రపరిచామని, లాకింగ్ కోడ్ తో సేఫ్టీ ఉండటంతో ఎలాంటి లీక్ లకు ఛాన్స్ లేదని విఎఫ్ఎక్స్ ప్రొడ్యూసర్ కనల్ కన్నన్ చాలా క్లారిటీగా చెప్పిన విషయం తెలిసిందే.

అయితే ఇప్పటికే ప్రీమియర్ షో పడిపోయిందని, అందుకే సాంగ్ ప్రోమోస్ లలో కనిపించని ఆ వీడియోలు బయటికి వచ్చాయని కొందరు చెబుతుండగా, సెన్సార్ టైంలో ఎవరైనా షూట్ చేసి ఉండొచ్చని ఇంకొందరు అంటున్నారు. ఏది ఏమైనా ఈ ఫోటోలు మాత్రం ఇప్పుడు తెగ వైరల్ అవుతున్నాయి.