రుద్రాక్ష కోసం మరోసారి కృష్ణవంశీతో సత్యవతి?

Posted: 02/01/2016 05:32 PM IST

తెలుగులో మళ్లీ ప్రస్తుతం వరుస సినిమాలతో బిజీ అవుతున్న ఒకప్పటి స్టార్ హీరోయిన్ రమ్యకృష్ణ. ఇటీవలే ‘బాహుబలి’, ‘సొగ్గాడే చిన్ని నాయనా’ వంటి సినిమాలతో మళ్లీ తన హవా మొదలెట్టేసింది. ‘బాహుబలి’లో శివగామిగా, ‘సొగ్గాడే చిన్ని నాయనా’లో సత్యవతి పాత్రలలో నటించి అదరగొట్టేసింది. ఈ రెండు సినిమాలు కూడా మంచి విజయం సాధించింది. ప్రస్తుతం రమ్యకృష్ణ డేట్స్ కోసం దర్శకనిర్మాతలు క్యూ కడుతున్నారు.

ఇదిలా వుంటే చాలా కాలం తర్వాత మళ్లీ తన భర్త కృష్ణవంశీ దర్శకత్వంలో రమ్యకృష్ణ చేయబోతున్నట్లుగా తెలిసింది. తెలుగు ఇండస్ట్రీ గర్వించదగ్గ దర్శకులలో ఒకరు కృష్ణవంశీ. కృష్ణవంశీ దర్శకత్వంలో తెరకెక్కిన ‘చంద్రలేఖ’ సినిమా సమయంలో రమ్యకృష్ణతో ప్రేమలో పడి, వివాహం చేసుకున్న విషయం తెలిసిందే. ఆ తర్వాత వీరిద్దరూ కలిసున్నప్పటికీ... గతకొద్ది కాలంగా కృష్ణవంశీ హైదరాబాద్ లో, రమ్యకృష్ణ చెన్నైలో విడివిడిగా వుంటున్నారు.

కృష్ణవంశీ దర్శకత్వంలో వచ్చిన ‘శ్రీ ఆంజనేయం’ చిత్రం తర్వాత మళ్లీ రమ్యకృష్ణ తన భర్త సినిమాలో నటించలేదు. కానీ చాలా కాలం తర్వాత మళ్లీ తన భర్త దర్శకత్వంలో నటించడానికి రమ్యకృష్ణ గ్రీన్ సిగ్నల్ ఇచ్చినట్లుగా తెలిసింది. కృష్ణవంశీ దర్శకత్వంలో ‘రుద్రాక్ష’ అనే లేడీ ఓరియెంటేడ్ సినిమా రూపొందనున్న విషయం తెలిసిందే.

ఇందులో ప్రధాన హీరోయిన్ పాత్రలో సమంత నటించనుంది. అలాగే ఇందులోని మరో కీలక పాత్రలో రమ్యకృష్ణ అయితే బాగుంటుందనే వుద్దేశ్యంతో రమ్యకృష్ణను కృష్ణవంశీ ఎంపిక చేసుకున్నట్లుగా తెలుస్తోంది. త్వరలోనే ఈ ప్రాజెక్టుకు సంబంధించిన అధికారిక ప్రకటన విడుదలకానుంది.