బాబోయ్.. అఖిల్ కు అంత అవసరమా?

Posted: 10/09/2015 01:27 PM IST

Akkineni akhil second movie remuneration

అక్కినేని అఖిల్ హీరోగా నటిస్తున్న ‘అఖిల్’ సినిమా షూటింగ్ ఇంకా పూర్తవ్వకముందే అఖిల్ కు క్రేజ్ భారీగా పెరిగిపోయింది. వి.వి.వినాయక్ దర్శకత్వంలో రూపొందుతున్న ఈ చిత్ర ట్రైలర్లు, పాటలు ఇటీవలే విడుదలయ్యి, మంచి టాక్ ను సొంతం చేసుకున్నాయి.

‘అఖిల్’ చిత్రాన్ని అన్నపూర్ణ స్టూడియోస్ సమర్పణలో శ్రేష్ట్ మూవీస్ బ్యానర్ పై హీరో నితిన్ భారీ బడ్జెట్ తో నిర్మిస్తున్నాడు. సయేశా సైగల్ హీరోయిన్. అనూప్, థమన్ సంగీతం అందిస్తున్నారు. అయితే ఈ సినిమా తర్వాత అఖిల్ రెండవ చిత్రాన్ని తానే చేస్తానంటూ గతకొద్ది కాలంగా ప్రముఖ నిర్మాత బండ్ల గణేష్ ప్రయత్నిస్తున్నట్లుగా వార్తలొస్తున్న విషయం తెలిసిందే.

అఖిల్ రెండవ సినిమాను నిర్మించే రైట్స్ తనకే ఇవ్వాలంటూ ఇటీవలే నాగార్జునను బండ్ల గణేష్ కలిసినట్లుగా వార్తలొచ్చాయి. ఈ విషయంలో బండ్ల గణేష్ చాలా ఆతృతగా వున్నట్లుగా తెలిసింది. అయితే తాజాగా మరో విషయం వెలుగులోకి వచ్చింది. అదేంటంటే... అఖిల్ రెండవ సినిమాకు 12 కోట్ల రెమ్యునరేషన్ ఇవ్వడానికి ఓ నిర్మాత సిద్ధంగా వున్నట్లుగా తెలిసింది.

‘అఖిల్’ సినిమా విడుదలవ్వకముందే ఓ నిర్మాత ఇలా భారీ ఆఫర్ ఇచ్చేసాడని తెలిసింది. అయితే ఆ నిర్మాత బండ్ల గణేష్ అయ్యాడా లేదా అనే విషయం త్వరలోనే తెలియనుంది. ప్రస్తుతం అఖిల్ తన రెండవ సినిమా గురించి ఎలాంటి నిర్ణయం తీసుకోలేదు. ‘అఖిల్’ సినిమా విడుదలయ్యాకే రెండవ సినిమా గురించి ఆలోచించనున్నట్లుగా తెలిసింది.

కానీ ఇలా సినిమా విడుదలకు ముందే నిర్మాతలు అఖిల్ రెమ్యునరేషన్ ను భారీగా పెంచేయడంతో భవిష్యత్తులో చిన్న చిన్న నిర్మాతలు అఖిల్ తో సినిమా తీయాలనే కోరిక తీరకుండా పోతుందేమోనని అర్థమవుతోంది. మొదటి సినిమాకే ఇంత రెమ్యునరేషన్ పెంచేస్తే ఇక భవిష్యత్తులో అఖిల్ రెమ్యునరేషన్ ను తట్టుకోలేమని కొంతమంది నిర్మాతలు భావిస్తున్నారట.

ఏదేమైనా మొత్తానికి అఖిల్ రెమ్యునరేషన్ అంతా కూడా తన మొదటి సినిమా ‘అఖిల్’పైనే ఆధారపడి వుంది. ‘అఖిల్’ హిట్టయ్యితే రెమ్యునరేషన్ పెరుగుతుంది. లేకపోతే మాములు రెమ్యునరేషన్ తోనే కంటిన్యూ అవ్వాల్సి వస్తుందని టాలీవుడ్ సినీవర్గాలు గుసగుసలాడుతున్నారు.

ఇదిలా వుంటే ప్రస్తుతం ‘అఖిల్’ సినిమా విడుదలకు సిద్ధమవుతోంది. ఇప్పటికే విడుదలైన థియేటర్ ట్రైలర్ కు మంచి స్పందన వస్తోంది. దసరా కానుకగా అక్టోబర్ 22న ఈ చిత్రాన్ని ప్రపంచ వ్యాప్తంగా విడుదల చేయడానికి చిత్ర యూనిట్ సన్నాహాలు చేస్తున్నారు. త్వరలోనే అన్ని వివరాలను అధికారికంగా ప్రకటించనున్నారు.