క్షణాల్లో ముఖం మెరిసిపోవాలా..?

Posted: 09/22/2014 04:39 PM IST

ప్రస్తుతకాలంలో మహిళలందరూ రోజువారి గృహకార్యకలాపాలు నిర్వహించుకోవడంతోపాటు ఉద్యోగాలు చేస్తున్న నేపథ్యంలో సౌందర్యానికి సంబంధించిన సమస్యలు తలెత్తుతాయి. ఆఫీసుకు వెళ్తున్న సమయంలో బయట వాతావరణ కాలుష్యం వల్ల ధుమ్ము, ధూళి అంత ముఖం మీద పేరుకుపోయి జిడ్డుగా మారిపోతుంది. అలాగే ఇంట్లో చేసే పనులతో చెమట విసర్జించి దుర్వాసనను కలిగించడమే కాకుండా చర్మసౌందర్యాన్ని దెబ్బతీస్తాయి. ఈ నేపథ్యంలోనే ముఖం సౌందర్యం అందవిహీనంగా తయారవ్వడంతోపాటు మచ్చలు కూడా ఏర్పడుతాయి. ఇటువంటి పరిస్థితుల్లో ముఖాన్ని కాంతివంతగా, సౌందర్యంగా మార్చుకోవాలంటే నిత్యం క్లీనర్స్ తో శుభ్రపరుచుకోవడం ఎంతో అవసరం. క్లీన్సర్ వల్ల చర్మ రంథ్రాలు శుభ్రపడి చర్మపు సహజ నూనెలు స్రవిస్తాయి. ఫలితంగా ముఖ చర్మంపై ముడతలు రాకుండా ఉంటాయి.

ముఖానికి సంబంధించిన క్లీనర్స్ మార్కెట్లో ఎన్నో లభ్యమవుతాయి. కానీ వాటిలో రసాయనాల గాఢత ఎక్కువగా వుండటంతో అవి చర్మంపై వుండే మురికితోపాటు చర్మపు సహజనూనెలను కూడా తుడిచిపెట్టుకుపోతాయి. ఫలితంగా చర్మం మృదువుగా, సాఫ్ట్ గా వుండదు. అలా కాకుండా వుండాలంటే.. కొన్ని సహజ పదార్థాలతో మనం ఇంట్లోనే క్లీనర్స్ ను తయారుచేసుకోవచ్చు. వీటిని నిత్యం సమయానుకూలంగా ముఖానికి రాసుకుంటే.. కాంతివంతమైన అందాన్ని పొందడంతోపాటు చర్మం మృదువుగా, చాలా సాఫ్ట్ గా వుంటుంది. మరి ఆ క్లీనర్స్ ను ఎలా తయారుచేసుకోవాలో ఒకసారి మనం తెలుసుకుందాం..

1. పాలు సహజసిద్ధమైన క్లీన్సర్. నిద్రకు ముందు పచ్చి పాలలో దూది ముంచి ముఖం, మెడకు రుద్దుకోవాలి. ఆరిన తర్వాత మళ్లీ రిపీట్ చేయాలి. ఆ తర్వాత పూర్తిగా ఆరనిచ్చి, చల్లని నీళ్లతో ముఖం కడిగేసుకోవాలి.

2. నూనె చర్మానికి : శనగపిండి, పచ్చిపాలు, పసుపు కలిపి ముఖానికి ప్యాక్ వేసుకోవాలి. 5 నిమిషాల తర్వాత నీళ్లతో కడిగేసుకుంటే చర్మం తాజాగా మారుతుంది.

3. పొడి చర్మానికి : తేనె, పెరుగులతో ఫేస్ ప్యాక్ వేసుకోవాలి. తేనె, పెరుగులు మాయిశ్చరైజర్‌లా పని చేసి పొడి చర్మాన్ని మృదువుగా మారుస్తాయి.

4. నార్మల్ స్కిన్ : దోసకాయ తరుగుతో ముఖంపై గుండ్రంగా రుద్దుకోవాలి. లేదా దోస రసం, పెరుగు సమపాళ్లలో కలుపుకుని ముఖానికి అప్లై చేయాలి. 5 నిమిషాల తర్వాత కడిగేసుకోవాలి.

5. అన్ని చర్మ తత్వాలు : అన్ని రకాల చర్మ తత్వాలకు సూటయ్యే క్లీన్సర్...రోజ్ వాటర్. రాత్రి నిద్రకు ముందు రోజ్‌వాటర్‌ను ముఖం మొత్తం అద్దుకుని పడుకుంటే తెల్లారేసరికి చర్మం మృదువుగా మారుతుంది.