ఏపిని కేంద్రం ఆదుకోవాల్సిందే: చంద్రబాబు

Posted: 11/25/2015 01:44 PM IST

Chandrababu said central govt must help ap

ఏపి సిఎం నారా చంద్రబాబు నాయుడు కేంద్రం మీద ఎంత మెతక వైఖరి అవలంబిస్తున్నారో అందరికి తెలుసు. కేంద్రం నుండి ఏపి కోసం ప్రత్యేక హోదా మీద ఎలాంటి హామీ రాకున్నా కానీ కేంద్రాన్ని పల్లెత్తి మాట అనలేదు. అయితే తాజాగా పరిస్థితిలో మార్ప వచ్చినట్లు కనిపిస్తోంది. తాజాగా చంద్రబాబు నాయుడు స్వరంలో కాస్త బేస్ పెరిగినట్లు కనిపిస్తోంది. నిన్నటి దాకా కేంద్రం అన్నీ చూసుకుంటుంది అని అన్న చంద్రబాబు నాయుడు ఇప్పుడు కేంద్రం తప్పక చూడాల్సిందే అని అంటున్నారు.

రాష్ట్ర విభజన తర్వాత ఆర్థిక ఇబ్బందుల్లో కూరుకుపోయిన ఏపీని కేంద్రం ఒడ్డున పడేయాల్సిందేనని ఆ రాష్ట్ర ముఖ్యమంత్రి నారా చంద్రబాబునాయుడు అన్నారు. కొద్దిసేపటి క్రితం విజయవాడలో మీడియాతో మాట్లాడిన సందర్భంగా చంద్రబాబు ఈ మేరకు కొన్ని కీలక వ్యాఖ్యలు చేశారు. నిన్న ఏపీ ఆర్థిక అవసరాల కోసం కేంద్రం రూ.700 కోట్లు విడుదల చేసిన సంగతి తెలిసిందే. కేంద్రం నుంచి విడుదలైన నిధులు రాష్ట్ర ఖజానాకు చేరిన మరునాడే ఈ విషయంపై చంద్రబాబు స్వరం పెంచడం గమనార్హం.

వరదల్లో చిక్కుకుని అల్లాడుతున్న ఏపీని కేంద్రం ఆదుకోవాల్సిందేనని కూడా చంద్రబాబు వ్యాఖ్యానించారు. వరద సాయాన్ని కూడా కేంద్రం వెంటనే విడుదల చేయాలని ఆయన అభ్యర్థించారు. రాష్ట్ర విభజన తర్వాత ఆర్థిక చిక్కుల్లో పడ్డ ఏపీకి విభజన చట్టం హామీల మేరకు కేంద్రం నిధులు విడుదల చేస్తుందని తాను ఆశిస్తున్నానని ఆయన పేర్కొన్నారు. పార్లమెంటు శీతాకాల సమావేశాలు ప్రారంభమవుతున్న నేపథ్యంలో చంద్రబాబు ఈ అంశాన్ని ప్రస్తావించడం ప్రాధాన్యం సంతరించుకుంది.