ఏపీకి స్పెషల్ కాదు.. స్పెషల్ స్పెషల్ స్టేటస్!

Posted: 08/25/2015 01:30 PM IST

ఆంధ్రరాష్ట్రంలో హాట్ టాపిక్ గా మారిన ‘ప్రత్యేక హోదా’ విషయంపై కేంద్రం ఇంకా నోరు మెదపడం లేదు కానీ.. అధికార టీడీపీ పార్టీ నేతలు మాత్రం ఒక్కొక్క సమయంలో ఒక్కొక్క అభిప్రాయాన్ని వెల్లడిస్తూ, ప్రజల్ని ఊరిస్తున్నారు. అదిగో అప్పుడు, ఇదిగో ఇప్పుడు అని నేతలు డప్పు వాయించుకుంటుంటే.. మరోవైపు సీఎం చంద్రబాబు దానికోసం ఢిల్లీకి పర్యటనల మీద పర్యటనలు చేసేస్తున్నారు. కానీ.. ఇంతవరకు ఏమాత్రం రిజల్ట్ లేదు కానీ, స్పెషల్ స్టేటస్ మాత్రం ఖచ్చితంగా వస్తుందంటూ పలు సందర్భాల్లో ఆసక్తికరమైన వ్యాఖ్యలు కూడా వెల్లడిస్తున్నారు. ఇప్పుడు తాజాగా కేంద్ర శాస్త్ర సాంకేతిక, భూ విజ్ఞానం శాఖ సహాయమంత్రి సుజనా చౌదరి ఆ తరహాలోనే ప్రత్యేక హోదాపై తన అభిప్రాయాన్ని వెల్లడించారు. ఏపీకి ప్రత్యేక హోదాకు మించిన ఆదరణ కేంద్రం నుంచి లభిస్తుందని ఆయన వ్యాఖ్యానించారు.

ప్రస్తుతం న్యూఢిల్లీలో వున్న సుజనా.. ఈ సందర్భంగా మీడియాతో మాట్లాడుతూ స్పెషల్ స్టేటస్ అంశంపై కీలక వ్యాఖ్యలు చేశారు. ఏపీకి స్పెషల్ కాదు.. స్పెషల్ స్పెషల్ స్టేటస్ వస్తుందని ఆయన అన్నారు. ప్రత్యేక హోదా అనే పదం వాడేందుకు కొన్ని సాంకేతిక సమస్యలు అడ్డుగా వున్నాయని ఆయన వెల్లడించారు. ప్రత్యేక హోదా వస్తే ఎన్ని రాయితీలు, ప్రయోజనాలు వస్తాయో.. వాటన్నిటినీ సాధించేందుకు తాము ప్రయత్నిస్తున్నామని సుజనా తెలియజేశారు. ఈయన ఈ విధంగా మాట్లాడటంపై అప్పుడే భిన్నాభిప్రాయాలు వెలువడుతున్నాయి. నిన్నటివరకు హోదా కచ్చితంగా వస్తుందని చెబుతూ వచ్చిన ఆయన.. నేడు హోదా మాత్రం రాదు కానీ వివిధ ప్యాకేజీలతో కూడిన రాయతీలు వుంటాయని చెప్పకనే చెప్పినట్లయిందని రాజకీయ విశ్లేషకులు తమ అభిప్రాయాల్ని వ్యక్తం చేస్తున్నారు. ఇంతకీ.. ఈ ప్రత్యేక హోదా సమస్య ఎప్పుడు తీరుతుందో?

AS