పవన్ని బాబు వాడుకుని వదిలేశారు : అంబటి

Posted: 07/08/2015 01:52 PM IST

Ysrcp leader ambati rambabu fires chandrababu naidu pawan kalyan press meet

‘ఓటుకు నోటు’, ‘ఫోన్ ట్యాపింగ్’ వ్యవహారాలపై మీడియా ప్రెస్ మీట్ లో పవన్ కల్యాణ్ స్పందించిన విషయం తెలిసిందే! దీంతో టీడీపీ వర్గాలు ఆయన మీద ఒంటికాలితో లేచిపడుతున్నారు. మొన్నటిదాకా పవన్ అంటే జేజేలు కొట్టిన టీడీపీ వర్గాలు ఇప్పుడు ఆయన మీద విమర్శనాస్త్రాలు సంధిస్తున్నారు. ఇదే అదునుగా భావించిన వైఎస్సార్ పార్టీ.. తనదైన శైలిలో చంద్రబాబు మీద మరోసారి విరుచుకుపడుతోంది. ఈ క్రమంలోనే తాజాగా వైకాపా అధికార ప్రతినిధి అంబటి రాంబాబు టీడీపీ పార్టీ, చంద్రబాబు మీద తీవ్రస్థాయిలో విమర్శలు గుప్పించారు.

జనసేన అధినేత పవన్ కల్యాణ్ ను ఏపీ ముఖ్యమంత్రి చంద్రబాబు నాయుడు వాడుకున్నంతసేపు వాడుకుని, ఇప్పుడు వదిలేశారని అంబటి ఆరోపించారు. పవన్ పై టీడీపీ ఎంపీలు విమర్శలు గుప్పించడం సామాన్యమైన విషయం కాదని.. ఇదంతా చంద్రబాబు డైరెక్షన్ లోనే జరిగిందని ఆయన అన్నారు. బాబు ఆమోదముద్ర లేనిదే టీడీపీ ఎంపీలు ఏమీ చేయలేరని చెప్పారు. ఏదేమైనప్పటికీ.. ఎవర్నైనా వాడుకుని వదిలేయడం చంద్రబాబు నైజమని అంబటి మండిపడ్డారు. పవన్ ను విమర్శించడానికి కొందర్ని పురమాయించి, మరికొందరికి పవన్ కు మద్దతుగా మాట్లాడే పనిని బాబు అప్పగించి ‘డబుల్ గేమ్’ ఆడుతున్నారని అంబటి స్పష్టం చేశారు.

ఇక అంబటి రాంబాబుతో మరికొంతమంది టీఆర్ఎస్ నాయకులు ఇదేవిధంగా బాబుపై విమర్శలు గుప్పిస్తున్నారు. ఎన్నికల నేపథ్యంలో టీడీపీకి మద్దతుగా ప్రచారం చేసి, ఆ పార్టీకి అధికారం దక్కేలా సపోర్ట్ చేసిన పవన్ మీద ఆ పార్టీ వర్గాలే విరుచుపడటం సమంజసం కాదని అంటున్నారు. మరి.. అంబటి రాంబాబు, వైకాపా చేస్తున్న వ్యాఖ్యలపై టీడీపీ వర్గాలు ఎటువంటి సమాధానమిస్తాయో వేచి చూడాల్సిందే!