వైకాపా పుట్టుకే అవినీతి పుట్టుక : బాబు

Posted: 05/27/2015 02:05 PM IST

తెలుగుదేశం పార్టీ ఎంతో ప్రతిష్టాత్మకంగా నిర్వహిస్తున్న మహానాడులో ఏపీ సీఎం చంద్రబాబు నాయుడు వైకాపా పార్టీ మీద నిప్పులు చెరిగారు. ఆ పార్టీ పుట్టుకే అవినీతి పుట్టుక అంటూ ఆయన ఘాటు వ్యాఖ్యలు చేశారు. ఎప్పటినుంచో అధికారంలో వున్న టీడీపీకి ఇంతవరకు టీడీ ఛానెల్, న్యూస్ పేపర్ లేదని.. కానీ ఆ అవినీతి పార్టీ ఆ రెండు వున్నాయంటూ ఆయన ఎద్దేవా చేశారు. ఇవన్నీ అవినీతి డబ్బుతోనే పెట్టారని చంద్రబాబు దుయ్యబట్టారు.

ఎవరైతే అవినీతికి పాల్పడ్డారో, దోపిడీ చేశారో.. వారిని ఎటువంటి పరిస్థితుల్లోనూ ఉపేక్షించేది లేదని చంద్రబాబు హెచ్చరించారు. అవినీతి డబ్బంతా కక్కించి.. ప్రజల అభివృద్ధికి వినియోగిస్తామని చెప్పారు. ప్రజల కోసం నిర్మిస్తున్న పట్టిసీమ ప్రాజెక్టును వాళ్లస్వార్థం కోసం అడ్డుకునేందుకు ప్రయత్నించారని.. కానీ అక్కడ ప్రజల నుంచి ఎటువంటి స్పందన రాకపోవడంతో వెనుదిరిగారని చంద్రబాబు పరోక్షంగా జగన్ పై విమర్శలు గుప్పించారు.

రాజధాని అంశంలోనూ జగన్ కొత్త నాటకానికి తెరతీశారని బాబు మండిపడ్డారు. రాజధాని నిర్మాణం జరగకుండా అనేక ఇబ్బందులు పెడుతున్నారని, కోర్టులకు వెళుతూ అడ్డుకునేందుకు ప్రయత్నిస్తున్నారని విమర్శించారు. వైకాపా, కాంగ్రెస్ పార్టీలకు ఎర్ర స్మగ్లింగ్ తో సంబంధాలున్నాయని, అందుకే ఈ విషయంపై వాళ్లు మాట్లాడటం లేదని అన్నారు. స్మగ్లింగ్ తో సంబంధవున్న ఏ ఒక్కరినీ వదిలిపెట్టమని బాబు హెచ్చరించారు.