Posted: 01/25/2012 06:28 PM IST

ఎప్పిటికెయ్యది ప్రస్తుత

మప్పటికా మాటలాడి యన్యుల మనముల్

నొప్పించక తానొవ్వక,

తప్పించుక తిరుగువాడు ధన్యుడు సుమతీ

 

ఎప్పటికెయ్యది-ఎప్పుడు ఏది, ప్రస్తుతం- అవసరమై, అప్పటికి- ఆ సమయంలో, ఆ మాటలాడి- తగిన విధంగా మాట్లాడుతూ, అన్యుల- ఇతరుల, మనముల్- మనసులను, నొప్పించక- బాధ కలిగించక, తా నొవ్వక- తనూ బాధపడకుండా, తప్పించుక తిరుగువాడు- జాగ్రత్తగా వ్యవహరించేవాడు, ధన్యుడు- సఫలీకృతుడు.

ఏ సమయానికి, సందర్భానికీ తగ్గట్టుగా మాట్లాడుతూ ఇతరులనూ నొప్పించుకుండా, తానూ బాధపడని విధంగా పరిస్థితులకనుగుణంగా మెసులుకుంటూ ఉండేవాడు సఫల జీవనాన్ని సాగిస్తాడు.

పూర్వకాలంలోని పద్యాలలోని సొంపు ఇందులో బాగా కనిపిస్తుంది. చెప్పదలచుకున్నదాన్ని స్పష్టంగా చెప్పటమే కాకుండా హృదయానికి తగిలేట్టుగానూ, కలకాలం గుర్తుండేట్టుగా చెప్పటమే సూక్తుల లక్ష్యం. సూక్తిని ఒక పాఠ్యభాగంలా కాకుండా సులభంగా అర్థమయ్యే విధంగా ఛందోబద్ధంగా చెప్పగలిగిన ఆకాలపు కవులకు వారే సాటి.

ఈ పద్యం అర్థం చేసుకుంటే కంటి ముందు కదిలే రూపం శ్రీకృష్ణావతారం. భాగవత భారతాల్లో వర్ణించిన శ్రీకృష్ణుడు సందర్భాన్నెరిగి జాగ్రత్తగా ఆచితూచి మాట్లాడేవాడు. అలా చెయ్యగలిగినవాళ్ళు ఎటువంటి అసౌకర్యాన్ని కలిగించే సన్నివేశం నుంచైనా సులభంగా బయటపడగలుగుతారు. మేనేజ్ మెంట్ కోర్సులో కూడా సంభాషణకు విలువిస్తారు. ఎఫెక్టివ్ కమ్యూనికేషన్ పేరుతో చెప్పేది అదే. నొప్పించక తానొవ్వక అన్నది కలకాలం గుర్తుండే మాట. ఇతరులను నొప్పించవద్దు, అలా గని నీవూ బాధపడవద్దంటారు ఈ శతక కర్త.

-శ్రీజ