యువకుడి ప్రాణాలను బలిగొన్న టిక్ టాక్

Posted: 09/23/2019 03:27 PM IST

టిక్ టాక్ పిచ్చి ఇప్పటికే ప్రపంచవ్యాప్తంగా పలువురి ప్రాణాలను హరించిన విషయం తెలిసిందే తాజాగా ఇది గ్రామాలకు కూడా విస్తరించి అక్కడి యువత ప్రాణాలను కూడా బలిగొంటోంది. వరద నీళ్లతో పొంగిపొర్లుతున్న వాగులో నిలబడి సరదాగా వీడియో తీసుకోబోతూ ప్రవాహానికి కొట్టుకుపోయాడు. స్థానికులు రక్షించే ప్రయత్నం చేసినా లాభం లేకుండా పోయింది. రెండు రోజుల తర్వాత ఎన్డీఆర్‌ఎఫ్ టీమ్‌ యువకుడి మృతదేహాన్ని వాగు నుంచి బయటకు తీశారు. నిజామాబాద్ జిల్లా భీమ్‌గల్‌ మండలంలో జరిగింది.

గోన్‌గొప్పుల్‌‌కు చెందిన దినేష్ రెండు రోజుల క్రితం తన ఇద్దరు స్నేహితులతో కలిసి ఊరు శివారులో ఉన్న కప్పల వాగుకు వెళ్లారు. అప్పటికే వాగు వరద నీళ్లతో పొంగిపొర్లుతోంది.. ముగ్గురు వాగులోకి దిగి టిక్‌టాక్ వీడియోలు తీసుకున్నారు. అదే సమయంలో వాగు ఉధృతి ఒక్కసారిగా పెరిగింది. దీంతో ముగ్గురు నీళ్లలో కొట్టుకెళ్లారు.. వెంటనే గమనించి స్థానికులు ఓ చీరను విసిరారు. ముగ్గురిలో గంగాజలం, మనోజ్‌లు బయటపడగా.. దినేష్ మాత్రం ప్రవాహానికి కొట్టుకుపోయాడు.

దినేష్ వాగులో గల్లంతు కావడంతో స్థానికులు అధికారులకు సమాచారం ఇచ్చారు. ఎన్డీఆర్‌ఎఫ్ టీమ్‌ను రంగంలోకి దించి గాలించగా.. ఆదివారం యువకుడి మృతదేహాన్ని గుర్తించి బయటకు తీశారు. కుమారుడ్ని విగత జీవిగా చూసి తల్లిదండ్రులు శోకసంద్రంలో మునిగిపోయారు. దినేష్ బతుకుదెరువు కోసం దుబాయ్‌ వెళ్లి.. మూడు నెలల క్రితం తిరిగి వచ్చినట్లు తెలుస్తోంది. వచ్చే నెలలో మళ్లీ దుబాయ్‌ వెళ్లాల్సి ఉండగా ఈ ఘటన జరిగింది.