సాధారణంగా ఇంటినిర్మాణం చేపట్టేవారు ముందుగా వాస్తుశాస్త్రం ప్రకారమే అన్ని గణాంకాలు చేసుకుంటారు. ఇంటి నిర్మాణం మొదలుపెట్టినప్పటి నుంచి అది పూర్తయ్యేంతవరకు అన్ని జాగ్రత్తలు తీసుకుంటారు. కానీ కొన్ని విషయాలలో అంతగా శ్రద్ధ చూపరు. దీంతో వారి ఇళ్లలో తరుచూ గొడవలు అవ్వడం, పిల్లలు అనారోగ్యానికి పాలవ్వడం జరుగుతుంటుంది. 

కొత్తగా ఫెంగ్ షుయ్ నిపుణులు చేపట్టిన పరిశోధనల ప్రకారం.. గృహంలో మెట్లనిర్మాణానికి సంబంధించి కొన్ని రహస్యాలను, నిజాలను బయటపెట్టింది. ఇళ్లల్లో వున్న మెట్లకింద ఎటువంటి ఎక్వేరియంలుగాని, ఫౌంటేన్ లు గాని వుంచకూడదని వారు హెచ్చరికలు జారీ చేస్తున్నారు. 

అంతేకాదు మెట్లకింద చిన్న చిన్న స్టోర్ రూమ్ లనిగాని, ఎటువంటి సామాన్లుగాని, బాత్ రూమ్ లు గాని నిర్మించుకోకూడదని బల్లగుద్ది మరీ చెబుతున్నారు. 

ఒకవేళ ఇటువంటి నిర్మాణాలు, ఎక్వేరియంలు మెట్లకింద వుంటే... దానివల్ల ఇంట్లో వున్న పిల్లలు అనారోగ్యానికి గురవుతారని, ఆర్థికపరంగా నష్టాలు కలుగుతాయని వారు పేర్కొంటున్నారు. 

సాధ్యమైనంతవరకు మెట్ల పక్కన రెయిలింగ్ లేదా నడిచేందుకు వీలుగా ఒక గోడను నిర్మించుకుంటే చాలా మంచిది. ఇలా కాని పక్షంలో తీవ్ర ఇబ్బందులను ఎదుర్కోవాల్సి వస్తుంది. 

అదేవిధంగా మెట్లకు ఎదురుగా బెడ్ రూమ్ కూడా వుండకూడదు. అలాగే ఇంటికి ప్రధానద్వారానికి ఎదురుగాగానీ లేదా హాలులో ప్రవేశించగానే మెట్లు వుండకూడదు. ఇలా వుండటం వల్ల చీ శక్తి ఇంట్లోకి ప్రవేశించిన వెంటనే హాలులో కాకుండా మెట్లద్వారా పైకి వెళ్లిపోతుంది. దాంతో హాలులోనే కాకుండా మిగతా గదుల్లో సరిపోయేంత చీ శక్తి లభించదు. ఇటువంటి సంఘటనలు జరగడం ఇంట్లో నివసిస్తున్న వారికి ఏమాత్రం మంచిది కాదు. 

అలాగే ఇంటి మధ్యభాగంలో మెట్లనిర్మాణం చేపడితే కుటుంబ కలహాలు ఏర్పడుతాయని వారంటున్నారు. ఉత్తరం లేదా వాయువ్య దిశలలో మెట్లుండటం వల్ల దురదృష్టం వెంటాడుతుందని కూడా నిపుణులు తీవ్రంగా హెచ్చరిస్తున్నారు.