పెళ్లి... అంటే జీవితాంతం ఒకరినొకరు తోడుగా వుంటూ పాలునీళ్లలా విడదీయని ఒక దాంపత్య అనుబంధం. ఈ సంప్రదాయాన్ని అన్ని మతాలవారు ఎంతో గౌరవప్రదంగా భావిస్తారు. అయితే సమాజం మారుతున్నకొద్దీ పెళ్లి బంధాలలో కూడా మార్పులు సంతరించుకుంటున్నాయి. 

పూర్వం భార్య.. భర్తలకు అన్ని సేవలు చేస్తూ, సమయానుకూలంగా అన్ని అవసరాలను చేసి పెట్టేది. భర్త కూడా భార్య మీద సర్వహక్కులు కలిగి వుండి.. తను చేసిన తప్పులకు అజమాయిషీ చేస్తూ యజమానిగా వ్యవహరిస్తూ వుండేవాడు. 

కానీ ప్రస్తుతకాలంలో ఆడవాళ్లు కూడా విద్య, ఉద్యోగం, ఆర్థికరంగాలలో ముందుకు సాగిపోతున్నారు. మారుతున్న అవసరాలకు అనుగుణంగా మహిళలు కూడా అన్ని రంగాలలో పాల్గొనవలసి అవసరం వస్తోంది. 

అయితే వివాహం చేసుకున్న తరువాత ఆర్థిక కారణాల వల్ల భార్యభర్తల మధ్య తగాదాలు ఏర్పడుతుంటాయి. ఒకరినొకరు అర్థం చేసుకోకుండా, తమ మధ్య వున్న దాంపత్య జీవితాన్ని దూరం చేసుకుంటారు. 

ఆడవాళ్లు, మగవాళ్లు నిత్యం ఆఫీసు పనుల్లో మునిగిపోవడం, ఆర్థిక కార్యకలాపాలలో ఎక్కువ సమయం కేటాయించుకోవడం వల్ల ఇద్దరి మధ్య దూరం పెరిగిపోతోంది. ఫలితంగా ఒకరినొకరు అర్థం చేసుకోకుండా దూరాన్ని పాటిస్తున్నారు. దీంతో వారి దాంపత్య జీవితానికే ప్రమాదముంది. 

భార్యాభర్తలు చేసుకునే చిన్నచిన్న తప్పులను అర్థం చేసుకోకుండా... దానికి పరిష్కారం వెదుక్కోకుండా.. తమ ఇష్టాలను ఒకరినొకరు తెలుసుకోకుండా... ఒకరినొకరు గైరవమర్యాదలుగా పలకరించుకోకపోవడంతో నిత్యం గొడవ పడుతుంటారు. నేటి యువకులలో ఇటువంటి ప్రభావాలు మరీ ఎక్కువగా పెరిగిపోయాయి. దానివల్ల వారు సుఖంగా జీవితాన్ని గడపక... విడాకులు తీసేసుకుంటున్నారు. ఉద్యోగస్తులైతే మరీను. 

అయితే భార్యాభర్తలు ఒకరినొకరు అర్థం చేసుకుని, గౌరవంగా తమ జీవితాన్ని ముందుకు సాగించాలంటే.. కొన్ని చిట్కాలు పాటిస్తే సరిపోతుంది. 

ఉద్యోగం చేస్తున్న భార్యాభర్తలు ఆఫీసు నుంచి రాగానే... ఒకరినొకరు అనవసరమైన ప్రశ్నలతో వేధించుకోకుండా కొద్దిసేపు ఒంటరిగా.. ప్రశాంతంగా వుండాలి. దీంతో వారు ఆఫీసు ఒత్తిడి నుంచి విముక్తి పొంది హ్యాపీగా ఫీల్ అవుతారు. 

ఒకరినొకరు ఇష్టంలేని కార్యాలలోనూ, పనులలోనూ బలవంతంగా తీసుకుని వెళ్లడం చేయకూడదు. తమతమ ఇష్టాలను ఒకరినొకరు తెలుసుకుని, దానికి అనుగుణంగా నడుచుకుంటే ఇద్దరి మధ్య గౌరవం చాలా పెరుగుతుంది. ఫలితంగా ఇద్దరు సుఖంగా వుండొచ్చు. 

మీ జీవితభాగస్వామిని అనవసరంగా అనుమానించకుండా స్వేచ్ఛగా గడిపేందుకు ప్రోత్సాహించండి. వారు వారి స్నేహితులతో బయటికివెళ్లేటప్పుడుగాని, పార్టీలకు వెళ్లేటప్పుడు ఆపకుండా వుండాలి. దీంతో ఇద్దరి మనస్సులో మనస్పర్థలు తొలగిపోయి ప్రేమానుభవాలు పెరుగుతాయి. 

మీ జీవిత భాగస్వామి మీనుంచి ఏమి కోరుకుంటుందో దానిని పూర్తి చేయడానికి సహకరించండి. వారికి తమకంటూ ఒక ప్రైవసీని అందించండి. కొంతమంది కొంతసమయంవరకు ఒంటరిగా వుండడానికి ఇష్టపడతారు. అటువంటి సమయాల్లో వారిని అనవసరంగా కదిలించకుండా వుంటే చాలా మంచిది. 

మీ భాగస్వామికి ఇష్టంలేని వస్తువులను వారికి తెలియకుండా దాచుకోవడానికి ప్రయత్నించండి. ఇలా చేయకపోతే వారు మీమీద కోపాన్ని పెంచుకుని, గొడవలు పడే ఆస్కారం వుంటుంది. 

భార్యగాని, భర్తగాని ఆఫీసు కార్యకలాపాలలో ఏమైనా కష్టాలు ఎదుర్కొనే పరిస్థితులు వస్తే ఒకరినొకరు పరస్పరం సహాయం చేసుకుంటే చాలామంచిది. దీంతో మీ మధ్య దూరం తగ్గడమే కాకుండా స్నేహాపూర్వకంగా జీవితాన్ని ఆనందంగా గడపవచ్చు.