ఆ ఇద్దరి మధ్య కొర‘టాస్’ ఎవరికో?

Posted: 08/25/2015 02:04 PM IST

Director koratala siva jr ntr allu arjun movie confusion

తెలుగు ఇండస్ట్రీలో రచయితగా కెరీర్ ప్రారంభించిన కొరటాల శివ.. ‘మిర్చి’ సినిమాతో డైరెక్టర్ గా అవతారమెత్తాడు. అప్పటికే రైటర్ గా మంచి పేరు సంపాదించిన ఆయన.. ‘మిర్చి’ ఘనవిజయం సాధించడంతో డైరెక్టర్ గానూ మార్కులు కొట్టేశారు. ఇక ఆ చిత్రం తర్వాత ఆయన ప్రిన్స్ మహేష్ బాబుతో జతకట్టి ‘శ్రీమంతుడు’ చిత్రాన్ని రూపొందించారు. ఓ గ్రామాన్ని దత్తత తీసుకుని, దాన్ని అభివృద్ధి ఎలా చేయాలోనన్న అంశంతో తెరకెక్కిన ఆ చిత్రం ప్రతిఒక్కరిని ఆకట్టుకుంది. ఈ సినిమా ఆయన్ను మరింత వెలుగులోకి తీసుకువచ్చింది. కొత్తదనంతో శివ ప్రేక్షకుల ముందుకు రావడంతో.. ఇప్పుడు చాలామంది కథానాయకులు ఆయనతో సినిమా చేసేందుకు ఆసక్తి చూపుతున్నారు.

ఈ క్రమంలోనే ఇద్దరు స్టార్ హీరోల పేర్లు తెరమీదకి వచ్చాయి. అందులో ఒకరు స్టైలిష్ స్టార్ అల్లు అర్జున్ కాగా, మరొకరు యంగ్ టైగర్ జూనియర్ ఎన్టీఆర్. వీరిద్దరిలో ముందుగా అల్లు అర్జున్ గురించి మాట్లాడుకుంటే.. ఇటీవలే ఈ స్టైలిష్ హీరో కొరటాల శివతో మాట్లాడినట్లు తెలిసింది. ఆ సందర్భంగానే శివ వినిపించిన కథ తనకి నచ్చడంతో వెంటనే ఓకే చెప్పడంతోపాటు అడ్వాన్స్ కూడా ఇచ్చి పంపించినట్లు ఫిల్మ్ నగర్ లో వార్తలు షికార్లు చేస్తున్నారు. అయితే.. కొరటాల మాత్రం ఎన్టీఆర్ కోసం కథ సిద్ధం చేసుకుని రెడీగా వున్నాడని మరో వార్త కొన్ని రోజుల నుంచి చక్కర్లు కొడుతోంది. ‘శ్రీమంతుడు’ సినిమా హిట్ కావడంతో ఎన్టీఆర్ తన తదుపరి సినిమా శివ దర్శకత్వంలో చేయాలని భావించాడని, అందుకే అతనికి ఛాన్స్ ఇచ్చినట్లు చెప్పుకుంటున్నారు. కానీ.. ఇంతలోనే అల్లు అర్జున్ ఎంట్రీ ఇచ్చి, శివకి గ్రీన్ సిగ్నల్ ఇచ్చినట్లు తెలుస్తోంది. బోయపాటితో ఇతను తీస్తున్న సినిమా కంప్లీట్ అయిన వెంటనే శివ సినిమా పట్టాలెక్కొచ్చని అంటున్నారు.

ఈ విధంగా వస్తున్న వార్తల్లో నిజమెంతో తెలియదు కానీ.. ప్రస్తుతం కొరటాల శివ మాత్రం ఆ ఇద్దరి హీరోల మధ్య ఇరుక్కుపోయినట్లు తెలుస్తోంది. నిజానికి ఎన్టీఆర్ కోసం తాను కథను తయారుచేసుకోగా.. ఇంతలోనే బన్నీ ఎంట్రీ కావడంతో శివ కాస్త డైలామాలో పడిపోయినట్లు చెప్పుకుంటున్నారు. ఇంతకీ శివ ముందుగా ఎవరికి గ్రీన్ సిగ్నల్ ఇస్తాడో వేచి చూడాల్సిందే!

AS