కుల్దీప్ కు ధోని స్ట్రాంగ్ వార్నింగ్.. నెట్టింట్లో వీడియో వైరల్

Posted: 09/26/2018 06:58 PM IST

Bowling karega ya bowler change karein ms dhoni snaps at kuldeep yadav

ఆసియా కప్‌లో భాగంగా దుబాయ్‌ వేదికగా భారత్‌-ఆఫ్గానిస్థాన్‌ మధ్య మ్యాచ్‌ తీవ్ర ఉత్కంఠభరితంగా సాగి చివరకు టై గా ముగిసింది. కాగా ఈ మ్యాచ్ లో సారధ్యబాధ్యతలను అందుకున్న ‘మిస్టర్‌ కూల్‌’ ధోనీ.. మరోసారి కెప్టెన్‌గా వ్యవహరించారు. కాగా, టీమిండియా బౌలర్లను అప్ఘన్ బ్యాట్స్ మెన్ చీల్చిచండాడుతున్న క్రమంలో ఓ ఘటన చోటుచేసుకుంది. కుల్‌దీప్‌ బౌలింగ్‌ చేస్తున్న సమయంలో ధోని అతనికి స్ట్రాంగ్ వార్నింగ్ ఇవాల్సి వచ్చింది.

కుల్‌దీప్‌ బౌలింగ్‌ చేస్తున్న సమయంలో ఫీల్డింగ్ లో మార్పులు చేయాలంటూ ధోనీపై ఒత్తిడి తెచ్చాడు. బౌలింగ్‌ మీద శ్రద్ధ పెట్టకుండా పదే పదే ఫీల్డింగ్ లో మార్పులు చేయాలంటూ అడుగుతుండటంతో ధోనీకి కోపం వచ్చింది. దీంతో మిస్టర్‌ కూల్‌ కాస్తా కోపోద్రిక్తుడయ్యాడు. వెంటనే ‘బౌలింగ్‌ చేస్తావా లేకపోతే నీ స్థానంలో వేరొకర్ని మార్చాలా?’ అంటూ గట్టిగా అరిచాడు. దీంతో కుల్దీప్‌ మారు మాట్లాడకుండా బౌలింగ్‌ కొనసాగించాడు. ఇందుకు సంబంధించిన వీడియో సామాజిక మాధ్యమాల్లో చేరి వైరల్‌ అవుతోంది.

అఫ్గాన్‌తో జరిగిన మ్యాచ్‌లో రోహిత్‌శర్మ విశ్రాంతి తీసుకోవడంతో అనుకోకుండా ధోని నాయకత్వ బాధ్యతలు చేపట్టాల్సి వచ్చింది. గతంలోనే ధోని వన్డే, టీ20 నాయకత్వ బాధ్యతల నుంచి తప్పుకున్న సంగతి తెలిసిందే. కాగా, ఈ మ్యాచ్ చివరి ఓవర్ వరకు ఊరించి.. ఉత్కంఠకు తెరలేపి.. తుదకు టైగా ముగిసిన విషయం తెలిసిందే. టీమిండియా అల్ రౌండర్ రవీంద్ర జడేజా తన బ్యాటుతో చివర్లో అకట్టుకుని విజయం మనదే అని చెప్పినా.. మరో బంతితో మ్యాచ్ ముగుస్తుందన్న క్రమంలో ఔట్ కావడంతో టీమిండియాకు విజయం దూరమైంది.