రోహిత్’తో గొడవపడ్డ వార్నర్’కు భారీ మూల్యం

Posted: 01/19/2015 04:16 PM IST

ముక్కోణపు సిరీస్’లో భాగంగా మెల్బోర్న్’లో జరిగిన భారత్-ఆస్ట్రేలియా రెండు వన్డేలో రోహిత్ శర్మ, డేవిడ్ వార్నర్ మధ్య గొడవ జరిగిన విషయం తెలిసిందే! ఆ గొడవ సారాంశమేమిటంటే... వార్నర్ విసిరిన ఓవర్ త్రోకు రోహిత్ ఓ పరుగు తీశాడు. దీనిపై విరుచుకుపడ్డ వార్నర్.. రోహిత్’తో వాగ్వాదానికి దిగాడు. ఈ సందర్భంగా రోహిత్ తన జాతీయ భాషలో వార్నర్’పై తిట్లపురాణం కొనసాగించగా.. ఆంగ్లంలో మాట్లాడమంటూ అతగాడు రోహిత్’ను సూచించాడు. అలా వీరిమధ్య ఆ గొడవ కాస్త వాడీవేడీగా జరుగుతున్న సమయంలో అంపైర్ల రంగప్రవేశంతో శాంతించింది.

అయితే ఈ వ్యవహారంలో వార్నరే దురుసుగా ప్రవర్తించాడు. అనవసరంగా రోహిత్’ను గెలకడమే కాకుండా అతనిని రెచ్చగొట్టే విధంగా మాట్లాడాడు. ఏదైతేనేం.. ఈ వ్యవహారం చివరికి అంతర్జాతీయ క్రికెట్ మండలి దృష్టికి చేరింది. దీనిపై విచారణ జరిపిన ఐసీసీ.. ఇందులో ఎవరిది తప్పుందో తేల్చి వారికి భారీ మూల్యం విధించింది. ఆ ఇద్దరి ఆటగాళ్ల మధ్య జరిగిన ఆ గొడవలో ఆస్ట్రేలియా క్రికెటర్ వార్నర్’దే తప్పు వుందని ఐసీసీ తన విచారణలో తేల్చింది. అనంతరం ఇందుకు అతడిపై మూల్యం విధిస్తూ.. అతడి మ్యాచ్ ఫీజులో 50 శాతం కోత వేస్తూ తన నిర్ణయాన్ని ప్రకటించింది.

AS