తిరుమలలో భక్తులు ఎందుకు గుండు చేయించుకుంటారు?

Posted: 04/07/2014 04:40 PM IST

సాధారణంగా జుట్టు అంటే ప్రతిఒక్కరికి ఇష్టమే. మగవారుకాని, మహిళలుకాని అందంగా కనిపించడానికి జుట్టు తమదైన పాత్రను వహిస్తాయి. జుట్టుకు సంబంధించి రకరకాల జాగ్రత్తలు తీసుకుంటారు. అనేకరకాలుగా జుట్టును అలంకరించుకుంటారు కూడా! 

జానపదంలో కూడా తల వెంట్రుకల సౌందర్యం కోసం జాగ్రత్తలు తీసుకునే విధానాలు కూడా వున్నాయి. జానపద విజ్ఞానం ప్రకారం తలవెంట్రుకలు ప్రతిఒక్కరికీ అపూర్వం. అంతేకాదు.. వెంట్రుకలను సంపదతో పోల్చి కేశాసంపద అని కూడా పిలుచుకుంటారు. 

ప్రాచీనకాలంలో కురులు ఎంత పొడవుగా పెట్టుకుంటే వారికి అంత విలువు, సంపద లభిస్తుందని భావించేవారు. అందుకే ఆరోజుల్లో మగవారు కూడా జుట్టును పొడవుగా పెంచుకుని, పూలను అలంకరించుకునేవాళ్లు. ముక్కుసూటిగా చెప్పుకోవాలంటే.. మనిషి కురులమీద చూపించే మమకారం మరేదానిమీద కూడా అంతగా చూపించడు. 

ఇంతటి విలువైన ఈ కురులను శ్రీవారి మీదున్న భక్తితో వాటిని తృణప్రాయంగా భావించి సమర్పించడం ఎంతో గొప్ప విషయంగా భావిస్తారు మనుష్యులు. తమ అందం కన్నా శ్రీవారి మీదున్న భక్తి ఎక్కువ అనే ఆనందంలోనే స్వామివారి ఆలయంలో జుట్టును సమర్పించుకుంటారు భక్తులు. 

అలా ఆ విధంగా మొదలయిన ఈ ఆచారం.. కాలం గడిచేకొద్దీ గుండు గీయించుకోవడం ఒక మొక్కుబడిగా మారిపోయింది. రకరకాల మొక్కుబడులతో తిరుమలకు వచ్చి గుండు గీయించుకోవడం ఒక ఆనవాయితీగా మారిపోయింది.