Posted: 02/22/2013 11:57 AM IST

నగరంలోని దిల్‌సుఖ్‌నగర్‌లో  ఈ రోజు సాయంత్రం రెండు చోట్ల బాంబు పేలుళ్లు జరిగాయి. ఈ ఘటనలో 22 దుర్మరణం చెందగా మరి కొంత మంది తీవ్రంగా గాయపడ్డారు. వెంకటాద్రి, కోణార్క్ థియేటర్లలో జంట పేలుళ్లు జరిగినట్లు తెలియవచ్చింది. పేలుళ్లతో ప్రజలు భయభ్రాంతులకు గురై పరుగులు తీశారు. ఆ సమయంలో తొక్కిలాట జరిగింది. సమాచారం తెలుసుకున్న పోలీసులు బాంబు స్క్వాడ్ సిబ్బందితో సంఘటనా ప్రదేశానికి చేరుకుని తనిఖీలు చేస్తున్నారు. హైదరాబాద్‌పై టెర్రరిస్టులు మళ్లీ పంజా విసిరారు. టెర్రరిస్టులు ముందస్తు ప్రణాళికతో విరుచుకుపడ్డారు. హైదరాబాద్‌లోని దిల్‌షుక్‌నగర్‌లో గల వెంకటాద్రి, కోణార్క్ సినిమా హాళ్ల సమీపంలో గురువారం సాయంత్రం శక్తిమంతమైన వరుస బాంబులు పేలాయి. ఈ దుర్ఘటనలో మొత్తం 22 మంది మృతి చెందినట్టు ప్రాథమిక సమాచారాన్ని బట్టి తెలుస్తున్నది. బాంబు పేలుడు సంభవించిన వెంటనే ప్రజలు హాహాకారాలు చేస్తూ అటు ఇటు పరుగులు తీయడంతో త్రొక్కిసలాట జరిగింది. వెంకటాద్రి థియేటర్ వద్ద 12 మంది, కోణార్క్ థియేటర్ వద్ద పది మంది మరణించినట్టు తెలుస్తున్నది, ఈ సంఘటనలో ఇంకా 26 మంది గాయపడ్డారు. గాయపడినవారిని ఆ సమీపంలోని ఆస్పత్రిలో చేర్పించారు.

పేలుళ్లు సంభవించిన ప్రాంతంలో విద్యుత్ సరఫరా నిలిచిపోయింది. దాంతో ప్రజలకు ఎటు వెళ్లాలో తెలియక పరుగులు తీస్తున్నారు. వాహనాలన్నీ నిలిచిపోవడంతో అక్కడ భారీగా రాకపోకలు నిలిచిపోయాయి. దిల్‌షుక్‌నగర్‌లోని సాయిబాబా గుడి వద్ద ఈరోజు గురువారం కావడంతో భక్తులు పెద్ద ఎత్తున అక్కడ ఉన్నారు. టెర్రరిస్టులు కావాలనే ఈ రోజును ఎంచుకున్నట్టు భావిస్తున్నారు. ఈ ప్రాంతం మొత్తం చాలా దయనీయంగా కనిపిస్తున్నది. గాయపడిన వారిలో పెక్కుమందికి చేతులు, కాళ్లు తెగిపడడంతో అక్కడ చూడడానికే చాలా భయానకంగా ఉంది. ఒక హీలో హోండాలో ముందుగా ఒక బాంబు పేలిందని తెలుస్తున్నది. ఆ తర్వాత మరో బాంబు ఆ సమీపంలోని టిఫిన్ సెంటర్‌లో పేలినట్టు తెలుస్తున్నది.ఈ దుర్ఘటన జరిగిన వెంటనే పోలీసులు అప్రమత్తమై రాష్ట్రమంతటా రెడ్ ఎలర్ట్ ప్రకటించారు. బాంబు పేలుడు గురించి తెలిసిన వెంటనే బాంబు స్క్వాడ్ రంగంలోకి దిగి అనుమానాస్పదంగా ఉన్న ప్రాంతాలలో గట్టి తనిఖీలు నిర్వహిస్తున్నారు. అత్యవసరమైతే తప్ప ఎవరూ బయటకు వెళ్లరాదని పోలీసులు సూచిస్తున్నారు.