Posted: 02/02/2013 02:31 PM IST

       గ్రేటర్ హైదరాబాద్ విస్తరిత ప్రాంతాల సవరణ మాస్టర్‌ప్లాన్-2031 సమాచారం అందుబాటులోకి వచ్చేసింది. మొదట చిత్రపటాల రూపంలో ప్రజల ముందుంచేందుకు హెచ్ఎండీఏ అధికారులు ఏర్పాట్లు పూర్తిచేయటంతో ఈ వెసులుబాటు అందుబాటులోకి వచ్చింది. తార్నాకలోని హెచ్ఎండీఏ ప్రధాన కార్యాలయంలో పని దినాల్లో ఉదయం 11నుంచి 4గంటల వరకు మండలాల వారీగా తీర్చిదిద్ధిన మ్యాప్‌లను చూసుకోవచ్చు. 35మండలాలకు సంబంధించిన ప్రణాళికను 32మ్యాప్‌ల్లో రూపొందించారు. ఫిబ్రవరి నెలాఖరు నాటికి డీవీడీ(ప్లాన్ సాఫ్ట్ కాపీ)లను కూడా విక్రయిస్తారు.
         కాగా,  ఐటీ, కన్వెక్షన్ సెంటర్, ఆంతర్జాతీయ విమానాశ్రయంతోపాటు మెరుగైన మౌలిక వసతులున్న నగరంగా హైదరాబాద్ ఖ్యాతి గడించింది. ఈ అభివృద్ధిని మరింత శాస్త్రీయంగా చేపట్టేందుకు తాజా మాస్టర్ ప్లాన్ ఉపయోగపడుతుంది. ఔటర్ రింగ్ రోడ్డు చుట్టూ బహుళ ప్రయోజన జోన్లను ఏర్పాటు చేస్తున్నారు. ఇక్కడ వాణిజ్య, నివాస భవంతులతోపాటు ఐటీ, కార్పొరేట్ గోడౌన్లు, లాజిస్టిక్ హబ్స్ ఏర్పాటుకు అవకాశం కల్పిస్తారు. ఈ ప్లాన్‌లో 13 అర్బన్ నోడ్స్‌ ను, 46 అర్బన్ సెంటర్లను ప్రతిపాదించారు. 2031నాటికి హైదరాబాద్ మెట్రోపాలిటన్ రిజీయన్ పరిధిలో 1.85 కోట్ల జనాభా అవసరాలను దృష్టిలో ఉంచుకొని ఈ ప్రణాళిక రూపొందించారు. పరిశ్రమల కోసం 209 ఎకరాలను కేటాయించారు.
      ఖానామెట్, ఇజ్జత్‌నగర్‌లలో ప్రత్యేక బిజినెస్ హబ్‌లను ఏర్పాటు చేయనున్నారు.  ఇప్పటికే హైటెక్ సిటీలో ఉన్న రైల్వే స్టేషన్‌ను పాదచారుల మార్కెట్‌కు అనుసంధానం చేసి ఓ బడా 'పెడస్ట్రీయన్ మార్కెట్' అభివృద్ధికి యత్నిస్తున్నారు. మొత్తం నగరాన్ని 'కన్వెక్షన్ క్యాపిటల్ ఆఫ్ ఇండియా'గా తీర్చిదిద్దడానికి కృషి జరుగుతోంది. అలాగే కోకాపేట భూముల కేసులో హెచ్ఎండీఏకు అనుకూలంగా తీర్పు వచ్చింది. ఈ నేపథ్యంలో అక్కడ ప్రతిష్ఠాత్మకమైన 'ఐటీ - బిజినెస్' హబ్‌ల ఏర్పాటుకు ప్రయత్నాలు జరుగుతున్నాయి.

...avnk