వామ్మో... అమితాబ్ ను పెట్టి మోడీది తీసేస్తాడట

Posted: 09/30/2014 03:53 PM IST

సినిమా ఇండస్ర్టీలో సంచనాలకు కేరాఫ్ అడ్రస్ అంటే రామ్ గోపాల్ వర్మ అని చెప్పాలి. వివాదాస్పద కామెంట్లు చేయాలన్నా.., వివాదాస్పద సినిమాలు తీయాలన్నా.., సినిమాను వివాదం చేయాలన్నా ఆయనకు ఆయనే సాటి. అలాంటి రామ్ గోపాలుడు మరో ప్రయత్నం మొదలు పెట్టాడు. ఈ సారి ఏకంగా ప్రధాని నరేంద్రమోడిని టార్గెట్ చేశాడు. మోడి జీవితం ఆధారంగా సినిమా తీయాలని డిసైడ్ అయ్యాడట. గతంలో ఇలాంటి ప్రయత్నాలు చేసి బాగానే పాపులర్ అయిన వర్మ.., ఇప్పుడీ సినిమాతో ఏం చేస్తాడో మరి, ఇక దీని గురించి మరిన్ని విషయాలు తెలుసుకుందాం.

ప్రధాని నరేంద్రమోడి జీవితం ఆధారంగా రూపొందించే ఈ సినిమాకు ‘భగవాన్’ అని పేరు పెట్టినట్లు సినిమా వర్గాలు అంటున్నాయి. ఇక హీరో వచ్చేసి మన బిగ్ బి అమితాబ్ బచ్చన్ ను ఎంపిక చేశారట. అయితే ఆయన ఇంకా ఓకే చేయలేదనుకోండి. మన వర్మాయ్ అయితే బచ్చన్ జీ తో మోడిజీ సినిమా తీయాలి అని తహతహలాడుతున్నాడు. ఎలాగైనా పెద్దాయనను ఒప్పించాలని ఫిక్స్ అయ్యాడని ఫిలింనగర్ వర్గాల టాక్. గతంలో బాల్ థాక్రే జీవితం ఆధారంగా ‘సర్కార్’ అనే సినిమా తీశాడు. అదే విధంగా తెలుగులో పరిటాల రవి జీవితం ఆధారంగా ‘రక్త చరిత్ర’ తెరకెక్కించాడు. ఇక దావూద్, చోటా రాజన్ జీవిత కధలను ‘కంపెనీ’ అనే సినిమా ద్వారా ప్రేక్షకులకు అందించాడు.

ఇలాంటి ప్రయోగాత్మక సినిమాలతో అందరి మన్ననలు పొందిన వర్మ ఇప్పుడు మోడి జీవితం ఆధారంగా సినిమా తీయాలి అనుకోవటం బాగానే ఉంది. సినిమా ఎప్పుడు మొదలవుతుంది, ఎప్పుడు బయటకు వస్తుంది అనే విషయంపై స్పష్టత లేదు. ఎందుకంటే తానుతీయబోయే జీవిత కధలకు క్షేత్రస్థాయిలో పర్యటించి కొంత మ్యాటర్ సేకరించి సినిమా తీయటం అలవాటు. అలాంటిది ఇప్పుడు వర్మ మోడి సినిమా కోసం ఆయన సొంతూరుకు వెళ్ళటంతో పాటు ఆర్.ఎస్.ఎస్. ప్రతినిదులను కలవాలి. బీజేపీ నేతలతో చర్చించాలి. ఓ చాలా చేయాలి. ఇదంతా అయిపోయి సినిమా త్వరగా పూర్తి అయి సక్సెస్ కొట్టి బిగ్ బీతో కలిసి ఐస్ క్రీం తింటూ తియ్యని వేడుక చేసుకోవాలనే అంతా కోరుకుందాం.

 

కార్తిక్