న‌టుడు సిద్ధార్థ్ శుక్లా మృతి.. ఉల్లిక్కిపడ్డ బాలీవుడ్

Posted: 09/02/2021 02:59 PM IST

Actor sidharth shukla dies of heart attack at the age of 40 tributes pour in

బాలీవుడ్ లో వరుసగా విషాదాలు చోటుచేసుకుంటున్నాయి. మరీ ముఖ్యంగా ప్రేక్షకులను ఎంతగానో అదరించాల్సిన యువనటుల మరణాలను అభిమానులతో పాటు సినీ పరిశ్రమ పెద్దలను, ప్రముఖులను కూడా అందోళనకు గురిచేస్తున్నాయి. తాజాగా న‌టుడు సిద్ధార్థ్ శుక్లా(40) మృతి చెందాడు. ఆయ‌న ఈ రోజు ఉద‌యం ఇంట్లో గుండెపోటుకు గురికాగా, ఆయ‌న‌ను కుటుంబ స‌భ్యులు కూప‌ర్ ఆసుప‌త్రికి తీసుకెళ్లారు. ఆయ‌న‌ను పరీక్షించిన వైద్యులు ఆయ‌న అప్ప‌టికే ప్రాణాలు కోల్పోయాడ‌ని చెప్పారు. సిద్ధార్థ్ కు తల్లి, ఇద్దరు అక్కలు ఉన్నారు.

బుల్లితెర నటుడిగానూ సిద్ధార్థ్ ప్రేక్ష‌కుల‌కు సుప‌రిచితుడు. ముఖ్యంగా 'బాలికా వ‌ధు' (తెలుగులో చిన్నారి పెళ్లికూతురు) సీరియ‌ల్ లో ఆయ‌న నటనకు మంచి పేరు వ‌చ్చింది. మొద‌ట మోడ‌లింగ్ చేసి, 2008లో బుల్లితెర న‌టుడిగా త‌న కెరీర్‌ను ప్రారంభించాడు. ప‌లు టీవీ కార్య‌క్ర‌మాల్లో పాల్గొన్నాడు. అనంత‌రం న‌ట‌న‌లో మంచి గుర్తింపు తెచ్చుకోవడంతో ఆయనకు బాలీవుడ్ పరిశ్రమ నుంచి ఆపర్లు వచ్చాయి. దీంతో ఆయన హిందీ చలనచిత్ర రంగలోకి ప్ర‌వేశించాడు. 2014లో కరణ్ జొహార్ నిర్మించిన 'హంప్టీ శర్మకి దుల్హానియా' ఆయ‌న న‌టించిన తొలి చిత్రం.

సిద్ధార్థ్ శుక్లా బిగ్‌బాస్‌ సీజన్‌ 13 విజేతగానూ నిలిచాడు. బిగ్ బాస్ 13లో గెల‌వ‌డంతో ఆయ‌నకు డిమాండ్ పెరిగింది. అప్పటి నుంచీ మంచి అవ‌కాశాలు వ‌స్తున్నాయి. ఈ స‌మ‌యంలో ఆయ‌న మృతి చెంద‌డం త‌మ‌ను షాక్ కు గురి చేసిందంటూ బాలీవుడ్ ప్ర‌ముఖులు ట్వీట్లు చేస్తున్నారు. ఆయ‌న మృతి ప‌ట్ల‌ సంతాపం వ్యక్తం చేస్తున్నారు. సిద్ధార్థ్ శుక్లా అకాల మరణం పట్ల ఆయన స్నేహితురాలు సనఖాన్, బాలీవుడ్ నటుడు మనోజ్ భాజ్ పాయ్, హితెన్ తెహ్వానీ, కపిల్ శర్మ, రవికిషన్, సమీర్ సోని, అక్షయ్ కుమార్ సహా పలువురు ప్రముఖులు తీవ్ర దిగ్భ్రాంతి వ్యక్తం చేశారు.