సిద్ధాపురం కోసం సూపర్ స్టార్ వైఫ్

Posted: 02/17/2017 09:13 AM IST

Namrata shirodkar for siddapuram village

సూపర్ స్టార్ మహేష్ బాబు సినిమా కాల్షీట్ల దగ్గరి నుంచి సోషల్ సర్వీస్ కు సంబంధించిన ప్రతీ వ్యవహారాలను తానే దగ్గరుండి చూసుకుంటుంది నమ్రతా శిరోద్కర్. ఈ క్రమంలో తెలుగు రాష్ట్రాల్లో రెండు గ్రామాలను దత్తత తీసుకున్న మహేష్ అందులో ఒకటయిన సిద్ధాపురం బాధ్యతలను కూడా ఈ ఘట్టమనేని కోడలికే అప్పజెప్పాడు ప్రిన్స్. బుర్రిపాలెం బాధ్యతలను మాత్రం తానే చూసుకుంటున్నాడు. తెలుగు మూలాలు లేకపోయినప్పటికీ సిద్ధాపురంను ఆదర్శ గ్రామంగా తీర్చిదిద్దాలన్న చొరవ ఎవరికైనా ఆశ్చర్యం కలిగించి తీరుతుంది.

మహాబూబ్ నగర్ జిల్లా కొత్తూర్ మండలంలోని ఈ గ్రామానికి నూతన రూపం కల్పించేందుకు ఇప్పటికే ఆమె ప్రయత్నాలు మొదలయ్యాయి కూడా. మొన్నామధ్యే ఆదర్శ నియోజకవర్గంగా పేరున్న తాడిపత్రి ఎమ్మెల్యే ప్రబాకర్ రెడ్డిని కలిసి చర్చలు చేసిన నమత్రా ఇక ఇప్పుడు స్వయంగా రంగంలోకి దిగిపోయింది. గురువారం రంగారెడ్డి జిల్లా కలెక్టర్ రఘునందన్ రావును కలిసిన నమ్రతా 30 లక్షల చెక్కును అందజేసింది. అత్యాధునిక వసతులతో ఓ పాఠశాల భవనం నిర్మించేందుకు ఆ సాయం అన్నమాట. సుధీర్ రెడ్డి అనే టాప్ ఇంజనీర్ ఆధ్వర్యంలో హైఫ్ గా దీనిని నిర్మించబోతున్నారు. ఇక వెంటనే ఆ వార్తను సంతోషంగా తెలియజేసింది కూడా.

‘‘ ఈ మహత్కార్యానికి సాయం అందించిన నాట్కో ట్రస్ట్ వాళ్లకి థాంక్స్. భావితరానికి ప్రతిభావంతులను అందించేందుకు ఈ ప్రయత్నం కోసం ఆత్రుతతో ఎదురు చూస్తున్నాను. సిద్ధాపురంను రాష్ట్రంలోనే మోడల్ గ్రామంగా తీర్చిదిద్దేందుకు కృషి చేస్తున్న వారందరికీ కృతజ్నతలు’’ అంటూ తెలియజేసింది నమత్రా. తన భర్త ఎంత బిజీగా ఉన్నప్పటికీ తాను మాత్రం ఆ వ్యవహారాలను చూసుకుంటానని చెబుతోంది.