వ్యభిచారం చేయించినందుకే నటి సూసైడ్

Posted: 11/04/2016 05:29 PM IST

Pratyusha benarjee forced for prostitution

ప్రముఖ టీవీ నటి, బాలికా వధు ఫేం ప్రత్యూష బెనర్జీ ఆత్మహత్య కేసులో ఇప్పటికే పలు సంచలనాలు వెలుగులోకి రాగా, తాజాగా మరో షాకింగ్ న్యూస్ బయటపడింది. ప్రియుడు రాహుల్ తో ఆఖరిసారిగా మాట్లాడిన ఫోన్ టేపుల సంభాషణలు లీక్ కావటం గురించి ఓ జాతీయ పత్రిక ప్రత్యేక కథనం ప్రచురించింది. ఇందులో ఆమెను వ్యభిచార కుంపలోకి దించాడన్న ఆరోపణలు వినిపిస్తున్నాయి.

మూడు నిమిషాలు ఉన్న ఆ ఫోన్ కాల్ లో ప్రత్యూష వ్యభిచారం అనే పదం వాడినట్లు తెలుస్తోంది. "నటించడానికి - పనిచేయడానికే ఇక్కడికి వచ్చాను తప్ప - ఒళ్లు అమ్ముకోవడానికి రాలేదు.. కానీ ఈరోజు నన్ను నువ్వు ఎక్కడ ఉంచావు? రాహుల్... నీకు తెలీదు నేనెంతగా కుమిలిపోతున్నానో.. నువ్వు స్వార్థపరుడివి.. నా పేరును చెడగొట్టావు.. నా గురించి నా తల్లిదండ్రుల గురించి జనం చెడుగా మాట్లాడుకుంటున్నారు"... అంటూ ఫోన్ లో మాట్లాడిందంటూ ఆ కథనంలో పేర్కొంది. అయిపోయింది. అంతా అయిపోయింది. నేను వెళ్లిపోతున్నా అంటూ చివరిసారిగా ప్రత్యూష అందులో మాట్లాడిందంట. అయితే ఆమెను ఆపడానికి రాహుల్ ఫ్లాట్ కు వచ్చేసరికి అప్పటికే ఘోరం జరిగిపోయినట్లు తెలుస్తోంది.

ఈ విషయం ప్రత్యూష తరపు న్యాయవాది నీరజ్ గుప్తా కూడా బలపరుస్తున్నాడు. వ్యభిచారం చేయాలంటూ రాహుల్ చాలా ఒత్తిడి చేశాడని, చివరి ఫోన్ కాల్ లో దాని మీదే ఇద్దరి మధ్య వాదన కూడా జరిగిందంటూ ఆయన పేర్కొన్నాడు. అంతేకాదు పోలీసులు ఈ కేసులో విచారణ చాలా నిదానంగా చేస్తున్నారంటూ, పక్కదోవ పట్టించే ప్రయత్నాలు కూడా చేశారంటూ ఆయన ఆరోపిస్తున్నాడు.

అయితే ఈ విషయాలపై రాహుల్ వాదన మరోలా ఉంది. ఎలాగైనా డబ్బు సంపాదించాలని ప్రత్యూషపై ఆమె తల్లిదండ్రులే ఒత్తిడి తెచ్చారని.. ఇప్పుడు డబ్బుకోసమే ఆమె తల్లిదండ్రులు తనపై తప్పుడు ఆరోపణలు చేస్తున్నారని రాహుల్ చెబుతున్నాడు. ప్రత్యూషకు అవకాశాలు దొరకనప్పుడు తానే అండగా నిలిచానని చెప్పుకొస్తున్నాడు.

కాగా ఆంధేరిలోని అపార్ట్ మెంట్ లో ఏప్రిల్ 1న ఉరేసుకుని ప్రత్యూష ఆత్మహత్య చేసుకున్న సంగతి తెలిసిందే! అయితే తాజాగా ఈ ఫోన్ సంభాషణలతో కేసులో ఒక క్లారిటీ వచ్చే అవకాశాలున్నట్లు తెలుస్తోంది.